Hewlêr (Rûdaw) - Ajansa Koçê ya Fînlandayê eşkere kir ku îsal hezar û 13 kesên Îraqî û Sûriyeyî mafê penaberiyê ji Fînlandayê xwestiye.
Ev hejmar par hezar û 391 bû.
Ajansa Koçê ya Wezareta Karên Navxwe ya Fînladayê, pirsên Rûdawê bersivandin.
Ajansê ragihand ku îsal 651 daxwazên mafê penaberiyê yên ji aliyê welatiyên Îraqê û 362 jî ji aliyê welatiyên Sûriyeyê ve hatine pêşkêşkirin.
Daxwaza 272 kesan hat redkirin
Ajansê di bersiva xwe ya Rûdawê de diyar kir ku wan îsal daxwazên 439 Îraqî û 215 Sûriyeyiyan qebûl kirine.
Li hemberî vê yekê, daxwazên 221 kesên Îraqî û 51 daxwazên kesên Sûriyeyî hatine redkirin.
Her wiha hat destnîşankirin ku niha 200 daxwazên welatiyên Îraqê û 225 daxwazên welatiyên Sûriyeyê di qonaxa nirxandinê de ne û li ber destên wan in.
Amarên dersînorkirinê
Ajansê derbarê dersînorkirina penaberan de jî ev agahî dan:
- Îraqî: Îsal 146, par 175 û pêrar jî 186 welatiyên Îraqê hatine dersînorkirin.
- Sûriyeyî: Îsal 2, pêrar 8 welatiyên Sûriyeyê hatine dersînorkirin, par Sûriyeyî nehatine dersînorkirin.
Fînlanda yek ji welatên Skandînavyayê ye, endama Yekîtiya Ewropayê û NATOyê ye û nifûsa wê 5,6 milyon e.