Hewlêr (Rûdaw) - Li Meksîkayê ji ber baranên dijwar û lehiyê, herî kêm 42 kes mirin û 27 kes jî winda ne.
Koordînasyona Neteweyî ya Parastina Sivîlan a Meksîkayê (CNPC) ragihand ku li eyaletên Veracruz, Puebla, Hidalgo, Queretaro û San Luis Potosiyê baranên dijwar bûne sedema lehiyê.
Di daxuyaniyê de hat gotin ku ji bo dîtina 27 kesên winda xebatên lêgerîn û rizgarkirinê bi awayekî berfireh didomin.
Li aliyê din, Serokkomara Meksîkayê Claudia Sheinbaumê bi parêzgarên 5 eyaletên ku herî zêde ziyan dîtine re civîneke online li dar xist.
"Ti kêmasiya mexdûran namîne”
Sheinbaumê piştî civînê di daxuyaniyekê de got:
"Ti kêmasiya mexdûran namîne. Tîm û peywirdarên hikûmeta Meksîkayê ji bo vekirina rêyan û alîkariya gel li qadê hatine bicihkirin."
Li gorî medyaya Meksîkayê, li 5 eyaletên ku rastî karesata lehiyê ya herî mezin a salên dawî hatine bi hezaran kes bê kahreba mane.
Ji ber herîkîna axê û diserveçûna çeman metirsî heye ku karesata lehiyê hîn jî mezintir bibe.
Li herêmên ku otoban, kolan û xanî di bin avê de mane baranên dijwar berdewam dikin.
