Hewlêr (Rûdaw) - Ciwanan Li Mexribê di xwenîşandanên bi pêşengiya "Tevgera Nifşê Z 212" de xwest ku di sîstemên perwerde û tenduristiyê de reform werin kirin, li dijî gendeliyê têkoşîn bê kirin û kesên ku di protestoyên berê de hatibûn desteserkirin werin berdan.
Roja şemiyê bi sedan ciwan li bajarên wekî paytext Rabat, Kazablanka û Tancayê li hev kom bûn û dirûşmên wekî "azadî ji girtiyan re" û "azadî, rûmet, edaleta civakî" berz kirin.
Tevgera ku wekî pêşengê protestoyên "Nifşê Zyê" tê dîtin, berê di navbera 27ê Îlonê û 9ê Çiriya Pêşîn de çalakî li dar xistibûn û paşê navber dabû.
Niha tevgerê ragihand ku dê xwenîşandan êdî her şemî û yekşem bên lidarxistin.
Hikûmetê piştî protestoyan lez daye projeyên reformê yên di warên tenduristî û perwerdeyê de û armanc dike ku ji bo daxwazên sereke yên protestoyan pêngavên berbiçav biavêje.
