Hewlêr (Rûdaw) - Balyozxaneya Amerîkayê ya Bexdayê êrişa li ser Qada Gazê ya Kormorê şermezar kir û ragihand ku ew amade ne ji bo parastina binesaziyê piştgiriyê bidin.
Amerîkayê diyar kir ku armanca van êrişan ew e ku "veberhênanên Amerîkayê yên li Herêma Kurdistanê bikin hedef."
Balyozxaneya Amerîkayê ya li Bexdayê derbarê êrişa ku doh şev li navçeya Çemçemalê ya Silêmaniyê li Qada Gazê ya Kormorê pêk hat daxuyaniyek belav kir.
Balyozxaneyê êriş wekî "êrişeke terorîstî" bi nav kir û xwest ku kiryarên wê werin sizadan.
"Dixwazin veberhênanên Amerîkayê bikin hedef"
Di daxuyaniya Balyozxaneyê de hat gotin:
"Dewletên Yekbûyî yên Amerîkayê êrişa terorîstî ya li ser Qada Gazê ya Kormorê ya li Silêmaniyê bi tundî şermezar dike.
Em tevlî Hikûmeta Herêma Kurdistanê û hevkarên din ên Îraqî dibin û bangî Hikûmeta Îraqê dikin ku gavên lezgîn bavêje da ku kiryarên vê êrişa terorîstî werin sizadan.
Ev êriş hewldana dawî ya aktorên xerab e ku dixwazin aramiya Îraqê têk bibin û veberhênanên Amerîkayê yên li Herêma Kurdistana Îraqê bikin hedef."
"Em amade ne piştgiriyê bidin"
Balyozxaneyê di berdewamiya daxuyaniyê de bersiva daxwazên parastinê da û got:
"Em amade ne ku piştgiriyê bidin hewlên parastina vê binesaziya krîtîk û em dê tekezîkirina li ser girîngiya serweriya Îraqê ya li hemberî hewldanên têkbirina wê û kontrolkirina hemû çekan, bi taybetî dron û mûşekan bidomînin."
The United States strongly condemns the terrorist attack against the Khor Mor gas field in Sulimaniyah. We join the Kurdistan Regional Government and other Iraqi partners in calling for immediate action by the Government of Iraq to hold accountable the perpetrators of this…
— U.S. Embassy Baghdad (@USEmbBaghdad) November 27, 2025
Mesrûr Barzanî sîstema parastinê xwestibû
Serokwezîrê Herêma Kurdistanê Mesrûr Barzanî piştî êrişê daxuyaniyek dabû û daxwaza sîstema parastinê kiribû.
Mesrûr Barzanî gotibû, “Ez ji hevparên me yên Amerîkî û navneteweyî dixwazim ku ji bo parastina binesaziya me ya medenî kel û pelên parastinê yên pêwîst dabîn bikin.”
Çi bûbû?
Doh bi şev nêzîkî demjimêr 11:30î êrişî Kêlgeha Gazê ya Kormorê ya li Çemçemalê hat kirin.
Di encama êrişê de agir bi depoyeke mezin a qadê ket.
Li gorî zanyariyên Rûdawê, nêzîkî demjimêr 09:00ê vê sibehê agir bi temamî hatiye kontrolkirin.
Ji ber êrişê şandina gazê ji bo wan stasyonên ku bi gazê kar dikin hat rawestandin, ev yek jî bû sedema kêmbûna ji sedî 80yê karebaya Herêma Kurdistanê.
