رووداو دیجیتاڵ
لیژنەی رێکخەری پاڵەوانێتیی جامی کەنداوی 27، داواکاری هەڵبژاردەی عێراقی بۆ زیادکردنی ناوی هەردوو یاریزانی کورد محەممەد دلاوەر یاریزانی نەورۆز و هیران ئەحمەد یاریزانی زەورا بۆ پێکهاتەی بەشدار لە پاڵەوانێتییەکە رەتکردەوە.
میدیای عێراق ئاشکرایانکردووە، بڕیاری رەتکردنەوەکە لەبەرئەوەیە ناوی ئەو دوو یاریزانە، لەنێو لیستی سەرەتایی هەڵبژاردەی عێراقدا نەبووە بەر لەوەی رەوانەی لایەنی رێکخەر بکرێت، ئەمەش پێچەوانەی رێنوێنییەکانی تۆمارکردنی یاریزانانە بۆ بەشداریکردن لە لیستی کۆتایی هەڵبژاردەکان لە پاڵەوانێتییەکە.
دەستەی هونەریی هەڵبژاردەی عێراق، بە سەرپەرشتی گراهام ئارنۆڵدی راهێنەر، دوای بەدواداچوونی ئاستی هەردوو یاریزان لە رکابەرییەکانی خولی ئەستێرەکانی عێراق، خواستی بەشداریکردنیانی هەبوو، بەڵام یاساکانی تۆمارکردنی یاریزانان رێگرییان لە بانگهێشتکردنیان کرد.
بەپێی ئەم بڕیارە، دەستەی هونەری هەڵبژاردەی عێراق ناچارە تەنیا پشت بەو ناوانە ببەستێت کە پێشتر لە لیستی سەرەتاییدا ناویان تۆمارکراوە، بەر لەوەی پێکهاتەی فەرمی بۆ جامی کەنداو رابگەیێنرێت.
هەڵبژاردەی عێراق یەکەم یاریی خۆی لە جامی کەنداو لە 23ـی مانگی نۆ بەرامبەر هەڵبژاردەی عومان ئەنجام دەدات.
