رووداو دیجیتاڵ
بارسێلۆنا بە پێشکێشکردنی ئاستێکی بەرز و بە ئەنجامێکی گەورە و شایستە، لە دەرەوەی یاریگای خۆی توانی سێ خاڵی زێڕین لە گاڵاتەسەرای تورکی بەدەستبهێنێت، پاش ئەوەی بە ئەنجامی (4-1) یارییەکەی لێ بردەوە.
یارییەکە، کە شەوی سێشەممە لە گەڕی دووەمی قۆناخی خولی چامپیۆنزلیگ بەڕێوەچوو، سەرەتا بە پێشکەوتنی خاوەن یاریگا دەستپێکرد؛ کاتێک لە خولەکی 28ـدا ئەلێکسی باتراکۆڤ گۆڵی پێشکەوتنی بۆ گاڵاتەسەرای تۆمارکرد، هەروەها ناوبژیوان لە خولەکی 36ـدا گۆڵێکی دووەمی بۆ یانە تورکییەکە لەرێگەی باریش یەڵمازـەوە رەتکردەوە.
بەڵام کاروانەکە بۆ کەتەلۆنییەکان بەمجۆرە نەما؛ پێش کۆتاییهاتنی نیوەی یەکەم لە خولەکی 43ـدا، جواو کانسێلۆ توانی ئەنجامەکە بۆ بارسێلۆنا یەکسان بکاتەوە.
لە نیوەی دووەمدا، یاریزانانی بلاوگرانا بە سەرکردایەتیی هانزی فلیکی راهێنەر، کۆنتڕۆڵی یاریگایان بە تەواوی گرتە دەست، فێرمین لۆپێز و ئانتۆنی گۆردۆن لە خولەکەکانی 50 و 53 دوو گۆڵی خێرایان تۆمارکرد و تیپەکەیان پێشخست، دوای ئەوە کەریم ئادێمی) لە خولەکی 65 گۆڵی چوارەم و یەکلاکەرەوە تۆمار بکات و سزایەکی قورس بەسەر خاوەن یاریگادا بسەپێنێت.
بەم سەرکەوتنە گەورەیە، بارسێلۆنا بە کۆکردنەوەی 6 خاڵ لە دوو یاری، لووتکەی ریزبەندی قۆناخی خولی چامپیۆنزلیگی بەدەستهێنا، لە بەرامبەردا گاڵاتەسەرای بێ بەش بوو لە خاڵ و لە پلەی 34ـەمینی ریزبەندیدا مایەوە.
ئەنجامەکانی دیکەی یارییەکانی چامپیۆنزلیگ:
ڤیاڕیال 3-1 ناپۆلی.
لایپزیگ 1-0 ئایندهۆڤن.
ئینتەر 3-4 کلەب بروج .
ئارسیناڵ 3-0 لیل
سپۆرتینگ 2-0 لانس.
ڤایکینگ 3-3 بایرن میونشن.
سەباح 2-0 سلاڤیا پراگ.
