رووداو دیجیتاڵ
ریال مەدرید سەرکەوتنێکی گەورە و متمانەبەخشی بەدەستهێنا، پاش ئەوەی لەسەر یاریگای 'سانتیاگۆ بێرنابیۆ' و لە گەڕی نۆیەمی خولی ئیسپانیا بە ئەنجامی (4-1) لە یانەی سێڤییای میوانی بردەوە، بەمەش پێشوازییەکی گەورەی لە یاریی لووتکەی داهاتوو کلاسیکۆ بەرامبەر بارسێلۆنا کرد.
یارییەکە، کە شەوی یەکشەممە بەڕێوەچوو، یانەی شاهانە بە سەرکردایەتیی جۆزێ مۆرینیۆی راهێنەر ئاستێکی بەرزی هێرشبەری پێشکەشکرد و سێ خاڵی زێڕینی بەدەستهێنا.
سەرەتای یارییەکە بە کۆنتڕۆڵی ریال مەدرید دەستپێکرد، تاوەکو لە خولەکی 30ـدا ئاردا گولەر گۆڵی پێشکەوتنی بۆ خاوەن یاریگا تۆمارکرد، و تەنیا حەوت خولەک دواتر لە خولەکی 37ـدا، شازادەی فەرەنسی کیلیان ئێمباپێ گۆڵی دووەمی بە لێهاتوویی زیادکرد.
لە نیوەی دووەمدا، ئێمباپێ دیسانەوە رۆڵی سەرەکی بینی، کاتێک لە خولەکی 63ـدا لەرێگەی لێدانی سزا گۆڵی سێیەمی بۆ ریال مەدرید تۆمارکرد و پێگەی تیپەکەی لە یارییەکەدا پتەوتر کرد.
سەرەڕای ئەوەی لە خولەکی 80ـدا مانو بۆینۆ گۆڵێکی بۆ سێڤییا تۆمارکرد و جیاوازییەکەی کەمکردەوە، بەڵام تەنیا دوو خولەک دواتر لە خولەکی 82ـدا یان دیۆماندی گۆڵی چوارەم و یەکلاکەرەوەی بۆ یانەی شاهانە تۆمارکرد و کۆتایی بە یارییەکە هێنا.
بەم سەرکەوتنە مەزنە، ریال مەدرید کۆی خاڵەکانی بەرزکردەوە بۆ 21 خاڵ و سەرکەوت بۆ پلەی سێیەمی ریزبەندیی خولی ئیسپانی، بە جیاوازیی 6 خاڵ لەگەڵ بارسێلۆنای پێشەنگ، لە کاتێکدا سێڤییا بە 14 خاڵ لە پلەی شەشەمی ریزبەندیدا مایەوە.
