رووداو دیجیتاڵ
ڤیتینیا، یاریزانی ناوەڕاستی پاریس سانجێرمان، بە لێدوانێکی نوێ و گرنگ جارێکی دیکە رۆڵ و پێگەی کریستیانۆ رۆناڵدۆی لە مێژووی تۆپی پێی پۆرتوگالدا پشتڕاست کردەوە، کاتێک ئەوی بە باشترین یاریزانی مێژووی وڵاتەکەی دانا و لەپێش ئەفسانەی تۆپی پێ، ئۆزێبیۆ هەڵیبژارد.
ئەم هەڵبژاردنە لە چالاکییەکدا بوو کە تێیدا داوا لە ڤیتینیا کرا بەراورد لەنێوان کۆمەڵێک لە گەورەترین یاریزانانی مێژووی تۆپی پێی پۆرتوگالدا بکات.
هەرچەندە ڤیتینیا دوای بڕیاری رۆناڵدۆ بۆ کۆتاییهێنان بە کاروانی نێودەوڵەتیی خۆی هیچ پەیامێکی راستەوخۆی بۆ نەکرد، بەڵام ئەم هەڵبژاردنەی وەک رێزگرتنێکی گەورە لە پێگەی ئەو ئەستێرەیە سەیر دەکرێت.
رۆناڵدۆ لە بەرامبەر ئەفسانەکانی پۆرتوگال
لە قۆناخەکانی ئەم چالاکییەدا، ڤیتینیا ناچار بوو لەنێوان چەندین ناوی گەورەی تۆپی پێی پۆرتوگالدا هەڵبژاردن بکات.
ئەو لە سەرەتا رۆی کۆستای بەسەر خۆیدا هەڵبژارد، پاشان دیکۆی بەسەر برۆنۆ فێرناندێز، پێپێ، نانی، پاولێتا و بێرناردۆ سیلڤادا پەسەند کرد.
دواتر لویس فیگۆی بەسەر دیکۆدا هەڵبژارد، بەمەش رێگا بۆ بەراوردێکی گرنگ لەنێوان ئۆزێبیۆ و کریستیانۆ رۆناڵدۆ خۆش بوو، بەڵام ئەستێرەی پاریس سانجێرمان بێ دوودڵی رۆناڵدۆی هەڵبژارد و ئەوی بە گەورەترین یاریزانی مێژووی پۆرتوگال دانا.
ژمارە و ئامارەکانی رۆناڵدۆ
هەڵبژاردنی ڤیتینیا بێ هۆکار نییە؛ چونکە کریستیانۆ رۆناڵدۆ خاوەنی ریکۆردی گۆڵکردن و ژمارەی یارییە نێودەوڵەتییەکانە لەگەڵ هەڵبژاردەی پۆرتوگال.
رۆناڵدۆ رۆڵێکی سەرەکی لە مێژووسازیی هەڵبژاردەکەیدا هەبوو و توانی لە یۆرۆی 2016ـدا یەکەم نازناوی گەورەی مێژووی پۆرتوگال بەدەست بهێنێت. هەروەها دواتر نازناوی نەیشنسلیگیشی لەگەڵ هەڵبژاردەی نیشتمانی بەدەستهێنا.
لە ئاستی یانەکانیشدا، ئەم یاریزانە لە مانچێستەر یونایتد، ریال مەدرید و یوڤێنتوس مێژوویەکی پڕ لە دەستکەوتی تۆمارکردووە و ئێستاش لەگەڵ یانەی نەسڕی سعودی بەردەوامە.
ئۆزێبیۆ؛ ئەفسانەیەک کە مێژووی لەبیر ناکرێت
لەگەڵ ئەوەی ڤیتینیا رۆناڵدۆی بەسەر ئۆزێبیۆدا هەڵبژارد، بەڵام ئەمە هیچ شتێک لە گەورەیی و پێگەی مێژوویی ئەو ئەفسانەیە کەم ناکاتەوە.
ئۆزێبیۆ ساڵی 1965 خەڵاتی باڵۆندۆری بەدەستهێنا و لە جامی جیهانیی 1966 بوو بە باشترین گۆڵکار، هەروەها رۆڵێکی گرنگی لە گەیشتنی پۆرتوگال بە پلەی سێیەمی ئەو پاڵەوانێتییەدا هەبوو.
لەگەڵ یانەی بێنفیکاشدا بەشدار بوو لە بەدەستهێنانی نازناوی جامی ئەورووپا لە ساڵی 1962 و لە یاریی کۆتایی بەرامبەر ریال مەدرید دوو گۆڵی تۆمارکرد، لە یارییەکدا کە بێنفیکا بەئەنجامی 5-3 سەرکەوت.
بەم هەڵبژاردنە، ڤیتینیا جارێکی دیکە جەختی لەسەر پێگەی تایبەتی کریستیانۆ رۆناڵدۆ کردەوە و ئەوی لە لووتکەی مێژووی تۆپی پێی پۆرتوگالدا دانا.
