رووداو دیجیتاڵ
ئێوارەی ئەمڕۆ شەممە لە گەڕی بیست و شەشەمی لالیگا، لامین یامال هاتریکێکی ناوازەی لە تۆڕی ڤیاڕیال تۆمارکرد و یانەکەی بەرەو سەرکەوتن برد.
بارسێلۆنا کە هەفتەی رابردوو پێشەنگی لالیگای وەرگرتەوە، لەبەردەم دەرفەتێکدا بوو بۆ ئەوەی جیاوازییەکە بە شێوەیەکی کاتی بۆ 4 خاڵ لەگەڵ ریال مەدریدی نزیکترین رکابەری.
سەرەتای یارییەکە کۆنترۆڵێکی روونی بارسێلۆنای بەخۆیەوە بینی، بەڵام تاوەکو خولەکی 28 چاوەڕێی کرد بۆ ئەوەی یامال گۆڵی یەکەم تۆمار بکات و بارسێلۆنا پێشبخات 1-0.
لە خولەکی 37دا بارسێلۆنا گۆڵی دووەمی لە رێگەی یامالەوە تۆمارکرد، دوای لێدانێکی سەرنجڕاکێش و ئەنجامەکەی کردە 2-0.
لە نیوەی دووەمدا، گێی لە خولەکی 49دا گۆڵی کەمکردنەوەی جیاوازییەکەی بۆ ڤیاڕیال تۆمارکرد، بەڵام دواتر یامال هاتریکەکەی تەواو کرد، کە یەکەم هاتریکی بوو لە کاروانی وەرزشیدا لەگەڵ تیپەکە لە خولی لالیگا و جارێکی دیکە درەوشانەوەی خۆی پشتڕاستکردەوە.
هێرشەکانی بارسێلۆنا بەبێ وەستان بەردەوام بوون تاوەکو لیڤاندۆڤسکی، کە لە نیوەی دووەمدا وەک یاریزانی جێگرەوە هاتە نێو یاریگا، توانی گۆڵی چوارەمی بارسێلۆنا تۆمار بکات و یارییەکە بە سەرکەوتنی تیپەکە بە ئەنجامی 4-1 کۆتایی پێبهێنێت، کە ئەمە 21ـەمین سەرکەوتنیان بوو لە 26 یاری لالیگادا.
بارسێلۆنا کۆی خاڵەکانی لە پێشەنگی خولی ئیسپانیا بۆ 64 خاڵ بەرزکردەوە، بە جیاوازی 4 خاڵ لە ریال مەدرید کە رۆژی دووشەممە رووبەڕووی خیتافی دەبێتەوە.
لە بەرامبەردا، خاڵەکانی ڤیاریال لە 51 خاڵدا مایەوە دوای ئەوەی تووشی هەشتەمین شکستی ئەم وەرزە بوو.
