رووداو دیجیتاڵ
ئەستێرەیەکی پێشووی بارسێلۆنا هەوڵی گەڕانەوەی بۆ کامپ نو دابوو، بەڵام هانزی فلیکی راهێنەر بۆ پاراستنی لامین یامال دەستبەجێ گرێبەستەکەی راگرتبوو!.
لەکاتێکدا ناوی لیۆنێل مێسی لە کەمپەینەکانی هەڵبژاردنی سەرۆکایەتی بارسێلۆنادا دووبارە دەبێتەوە و بەڵێنی گەڕانەوەی لە داهاتوودا دەدرێت، راپۆرتەکان ئاشکرایان کردووە کە تەنیا ساڵێک لەمەوبەر ئەستێرەیەکی دیکەی یانەکە لە گەڕانەوە نزیک بووەتەوە، بەڵام فلیک بووەتە بەربەست و نەیهێشتووە یانەکە ئەو یاریزانە بگەڕێنێتەوە.
لە کانوونی دووەمی 2025 نەیمار داسیلڤا پەیوەندی بە خوان لاپۆرتای سەرۆکی یانەکە و دیکۆی بەڕێوەبەری وەرزشییەوە کردووە و خۆی پێشنیاز کردووە بۆ گەڕانەوە، ئەمەش دوای هەڵوەشاندنەوەی گرێبەستەکەی لەگەڵ یانەی هیلالی سعودی بەهۆی ئەو قۆناخەی کە تێیدا بەدەست پێکانە بەردەوامەکانییەوە دەیناڵاند.
بیرۆکەی گەڕانەوەی ئەستێرە بەرازیلییەکە رەهەندێکی مارکێتینگی گەورەی هەبوو، چونکە چاوەڕوان دەکرا داهاتی ریکلام و مافی وێنە و فرۆشتنی درێسەکان بەشێوەیەکی بەرچاو زیاد بکات. هەروەها سنوورداری بژاردەکانی هێرشبەری لەو کاتەدا وایکردبوو پێشنیازەکە لەڕووی ئابوورییەوە سەرنجڕاکێش بێت.
بەگوێرەی سەرچاوەکانی نزیک لە یانەی بارسێلۆنا، ئەوکات هانزی فلیکی راهێنەری ئەڵمانی دەستبەجێ دەستوەردانی کرد و بەهۆی چەند هۆکارێکی تەکنیکی روونەوە بیرۆکەکەی رەتکردووەتەوە، چونکە پێیوابوو پێویست ناکات گرێبەست لەگەڵ یاریزانێکدا بکەن کە لووتکەی تواناکانی تێپەڕاندووە، هەروەها گومانی هەبوو کە ئایا نەیمار رازی دەبێت بەوەی وەک یاریزانێکی یەدەگ لە تیپەکەدا بێت.
پاراستنی ژووری جلگۆڕین و لامین یامال
بەگوێرەی ئەو سەرچاوانە، راهێنەرەکە لە ئاستی هەردوو لاوە لاوەکەی، بەتایبەت لامین یامال و رافینیا لەسەر باڵەکان رازی بوو، نەیدەویست هیچ توخمێک بهێنێتە ناو پێکهاتەکە کە ببێتە هەڕەشە بۆ سەر سەقامگیریی سیستمە تەکنیکییەکە یان کاریگەری نەرێنی لەسەر کەشوهەوای ژووری جلگۆڕین دروست بکات.
بەپێی ئەوەی رۆژنامەی گلۆبۆ ئیسپۆرت بڵاویکردووەتەوە، گرنگترین پاڵنەر لە پشت رەتکردنەوەی ئەو گرێبەستە پاراستنی پڕۆژەی یانەکە بوو کە لەسەر گەنجان بونیاد نراوە، لە سەرووی هەمووشیانەوە لامین یامال.
ئەو رۆژنامەیە دەڵێت "فلیک پێیوابوو گواستنەوەی نەیمار، بەو تەمەن و مێژووە تەندروستی و رەفتارانەی لە دەرەوەی یاریگە، لەوانەیە ببێتە هۆی سەرقاڵکردن یان کاریگەری نەرێنی لەسەر گەشەکردنی ئەو یاریزانە لاوە دروست بکات".
ئەم بڕیارە هەنگاوەکەی پێپ گواردیۆلای بیرهێناینەوە کاتێک لە رابردوودا بڕیاری دوورخستنەوەی رۆناڵدینیۆی دا، بەمەبەستی پاراستنی گەشەکردنی لیۆنێل مێسی لەنێو بارسێلۆنادا.
بڕیارەکەی فلیک سۆزداری یان بۆ مارکێتینگ نەبوو، بەڵکو لەسەر بنەمای دیدگایەکی درێژخایەن بوو کە سەقامگیریی تەکنیکی و پاراستنی بەهرەمەندە لاوەکانی لەپێشتر دانا لە بەرامبەر گرێبەستێک کە دەبووە هۆی دەنگدانەوەیەکی میدیایی گەورە.
