Bihayê zêr wekî xwe ma

Hewlêr (Rûdaw) - Îro bihayê zêr neguherî û wekî xwe ma.

Di vê navberê de hilbirîner agirbesta demkî ya di navbera Hizbulah û Îsraîlê de dinirxînin.

Her wiha ew li benda agahiyên nû yên li ser dan û standinên Amerîka û Îranê ne.

Îro onsa zêr bi 4 hezar û 481 dolaran tê kirîn û firotin û bihayê zêr wekî xwe maye.

“Heta niha ti peyman nînin”

Şîrovekarê Şirketa Şêwirmendiyê ya Tasty Liveyê Ilya Spivak li ser mijarê axivî û got:

"Destpêka vê hefteyê, hêviyeke zêde hebû ku dibe ku agirbesta di navbera Îran û Amerîkayê de heta 60 rojên din were dirêjkirin.

Lê li şûna vê yekê, xuya ye her du aliyan jî israr li ser xetên xwe yên sor kiriye û heta niha ti peyman di navbera wan de nînin."

Roja duşemê Libnanê agirbesteke demkî di navbera Hizbulah û Îsraîlê de ragihand.

Ew şerê li Libnanê bûbû sedema kuştina bi hezaran kesan û koçberbûna bi dehan hezar kesên din.

Hevdîtinên bi Îranê re didomin

Pêştir medyaya fermî ya Îranê ragihandibû ku Îranê ji ber şerê Libnanê dan û standinên bi Amerîkayê re rawestandine.

Her wiha hatibû gotin ku dibe Îran dawiyê li agirbestê bîne.

Lê Serokê Amerîkayê Donald Trump ragihand ku hevdîtinên bi Îranê re bi lez didomin.

Niha hilbirîner li benda belavbûna raporên derfetên kar ên li Amerîkayê ne.

Tê gotin ku ev rapor dawiya vê hefteyê werin belavkirin.

Çavê bazirganan li Amerîkayê ye

Çavê bazirganan li daxuyaniyên berpirsên Banka Navendî ya Amerîkayê ye.

Bazirgan dixwazin ji van daxuyaniyan hinek nîşaneyên li ser berê siyaseta diravî ya Banka Navendî ya Amerîkayê wergirin.

Ilya Spivak di wê baweriyê de ye ku eger zêr ber bi bilindbûnê ve biçe, divê astengiya sereke ya li derdora 4 hezar û 900 dolarî bişkîne.