Hewlêr (Rûdaw) - Alîkarê Birêvebirê Parastina Sivîlan
ê Mehabadê diyar kir ku 2 ciwan ketine Bendava Mehabadê û xeniqîne.
Termên her du ciwanan ji bendavê hatin derxistin û ew
veguhastin Saziya Tiba Dadî ya Mehabadê.
Li gorî agahiyan, bûyer derdora saet 20:00ê şeva pêncşemê
qewimiye.
Alîkarê Birêvebirê Parastina Sivîlan ê Mehabadê Serdar
Fedakar ragihand ku piştî agahdarkirinê wan tîmek şandiye cihê bûyerê.
Yekî xwestiye yê din rizgar bike
Serdar Fedakar li ser bûyerê got:
"Li gorî gotina şahidan, yek ji wan kesan ketiye bendavê
û yê din jî ji bo rizgarkirina wî xwe avêtiye nav avê lê mixabin her du jî
xeniqîne."
Serdar Fedakar nasnameya wan her du kesan eşkere kir û anî
ziman ku Zanko Qadirzadeyê 37 salî û Mihemed Kerîmiyanê 18 salî canê xwe ji
dest daye.
Li gorî agahiyan, doh termê Mihemed Kerîmiyan ji aliyê tîmên
Parastina Sivîlan û tîmên bin avê yên Mehabadê ve hatiye derxistin.
Lê belê hewldanên ji bo dîtina termê Zanko Qadirzade bêencam
mabûn.
Îro ducare dest bi xebatên lêgerîna termê Zanko Qadirzade hat
kirin û piştî hewldaneke zêde termê wî jî hat dîtin û ji avê hat derxistin.