Hewlêr (Rûdaw) - Birêvebirê Herêma Tenduristiyê ya Hisîçayê ji Rûdawê re ragihand ku dosyeya tevlîkirina xebatkarên Desteya Tenduristiyê ya li ser Wezareta Tenduristiyê ya Sûriyeyê bi temamî bi dawî bûye.
Di vê çarçoveyê de hezar û 446 bijîşk û karmend tevlî Wezareta Tenduristiyê ya Sûriyeyê bûn.
Birêvebirê Tenduristiyê yê Hisîçayê Dr. Kawa Xidir ji Tora Medyayî ya Rûdawê re got:
"Dosyeya yekkirina Desteya Tenduristiyê ya bi Wezareta Tenduristiyê ya Sûriyeyê re temam bû.
Hezar û 446 bijîşk û karmendên îdarî hatin yekkirin."
Rewşa meaşên karmendan
Dr. Kawa Xidir li ser meaşên wan karmendan eşkere kir ku yên mehên Hezîran, Tîrmeh û Çiriya Pêşîn ji bo karmendên hatine yekkirin hatine dayîn û da zanîn:
"Tenê meaşên mehên Tebax û Îlonê mane, ew jî dê di nava vê mehê de li wan werin dabeşkirin."
Birêvebirê Herêma Tenduristiyê ya Hisîçayê her wiha diyar kir ku meaşên karmendên mayînde yên meha Çiriya Paşîn û yên karmendên bi girêbest ên meha Çiriya Pêşîn hatine dayîn.
Meaş bi rêya Cham Cashê tên wergirtin
Dr. Kawa Xidir destnîşan kir ku ev meaş li gel heqdest û tezmînatên taybet ên karmendên tenduristiyê, ji bo şirketa Cham Cashê hatine veguhastin.
Karmend dikarin li gorî mekanîzmaya diyarkirî meaşên xwe ji sibe û pê ve ji wir wergirin.
.jpg&w=3840&q=75)