Hewlêr (Rûdaw) - Fermandarê Hêzên Demokratîk ên Bakur Ebû Omer Îdlibî balê dikişîne ser dîroka hevbeş a Kurd û Ereban.
Îdlibî rexneyên tund li wan kesên “mêjîteng” digire ku dixwazin gelekî mezin di nav partiyekê an jî îdeolojiyekê de sînordar bikin.
Îdlibî destnîşan dike ku beriya Peymana Sykes-Picotê ti sînor di navbera gelan de nebûn.
Li gorî Îdlibî, dabeşbûna niha encama wê peymana "bêqidoş" e ku herî zêde zerer gihandiye civaka herêmê.
Hêzên Demokratîk ên Bakur beşek ji Hêzên Sûriyeya Demokratîk (HSD) in.
Fermandarê vê hêzê Ebû Omer Îdlibî îro yekşemê li ser hesabê xwe yê Xê peyamek belav kir.
"Kurd gelekî resen in"
Îdlibî di peyama xwe de got:
“Yek ji wan mijarên ku herî zêde mirov matmayî dihêle ew e ku hinek kes hîn jî bi vî rengî behsa Kurdan dikin.
Tu dibêjî qey ew tenê partiyek, îdeolojiyek an jî projeyeke siyasî ya yekgirtî ne.
Wiha diyar e ku ew ne ji dîrokê ne û ji cewherê gelan jî tiştekî nizanin.
Kurd gelekî resen in û bi sedsalan e li vê herêmê ne. Ew ne dahênaneke nû ne û ne jî rewşeke awarte ne.
Di nav wan de Misilmanên Sunî, Elewî, Êzidî, Şîe, Xiristiyan û Cihû hene.
Di nav wan de sofî, kevneparêz, sekuler, neteweperwer, Îslamî û çepgir hene.
Her wiha bi dehan partî û tevgerên wan ên cuda hene, tam wekî rewşa li cem Ereban.
"Sînor qet nebûn"
Beriya Peymana Sykes-Picotê ya bêqidoş ev sînor qet nebûn. Ereb, Kurd û gelên din bi sedsalan mil bi mil jiyan.
Bazirganî, berjewendî, cîrantî, ol û çarenivîsa hevbeş ew li cem hev kom dikirin.
Sykes-Picotê beriya Kurdan Ereb dabeş kirin û civakeke temam parçe parçe kir ku di nav asoyeke erdnîgarî û dîrokî ya yekgirtî de dijiyan.
Piştre sînor danîn da ku birayan, xizman, bajaran û bazaran ji hev qut bikin.
Di rastiya me ya Sûriyeyê de ku em hemû tê de dijîn, bi dehan gundên Ereb û Kurdan nan, av, şahî û xemên xwe parve kirine.
Bi dehan salan berjewendî û jiyana malbatan bi hev ve hatine girêdan.
Loma sînordarkirina miletekî temam di nav partiyekê, rêxistinekê yan jî di qonaxeke siyasî ya diyarkirî de, ne têgihiştina dîrokê ye belkî nexwendewarî û nezanîn e.
"Rastî gelekî mezintir e"
Pirsgirêk ew e ku hinek kesên mêjîteng hemû dîrokê di dirûşmekê, di postekê yan jî di vîdeoyekê de kurt dikin.
Piştre hewl didin xelkê razî bikin ku tenê ew ji rastiyê tê digihin. Lê belê rastî ji vê nêrîna teng gelekî mezintir e.
Naskirina dîroka Kurdan ji rûmeta Ereban kêm nake. Wekî çawa naskirina dîroka Ereban jî ji rûmeta Kurdan kêm nake.
Ew gelên ku baweriya wan bi xwe heye ji dîrokê natirsin û dîrokê wekî ku heye dixwînin.
Di dawiyê de bila em bipirsin: Tu li dijî Sykes-Picotê yî yan pê re yî?”
