Li Kamyaranê xwişk û birayek hatin desteserkirin

Hewlêr (Rûdaw) - Xwişk û birayekî ji bajarê Kamyaranê yê Rojhilatê Kurdistanê, ji aliyê hêzên ewlehiyê yên Îranê ve hatin desteserkirin û ji bo cihekî nediyar hatin veguhestin.

Rêxistinên mafên mirovan ên Rojhilatê Kurdistanê ragihand, "Hêzên ewlehiyê li gundê Lonê yê bajarê Kamyaranê xwişk û birayek desteser kirin."

Hat ragihandin ku hêzên ewlehiyê bêyî agahdarkirinê bi ser mala Kejal Rehmanî û Danyal Rehmanî de girtiye.

Hêzên ewlehiyê ew desteser kirine û ji bo cihekî nediyar birine.

Danyal Rehmanî xwendekarê beşa endezyariya komputerê ye Zanîngeha Azad a Sineyê ye.

Heta niha li ser sedema desteserkirinê û cihê ragirtina Kejal Rehmanî û Danyal Rehmanî ti agahî nînin.

Xwişk û birayê endamekî KODARê ne

Li gorî rêxistinên mafên mirovan, ew xwişk û birayê Cemal Rehmanî ne ku endamê Konseya Serkirdayetiya Civaka Demokratîk û Azad a Rojhilatê Kurdistanê (KODAR) bû.

Ew sala 2017an li gel 2 endamên din ên PJAKê li navçeya Pîrbaxiyê ya Kamyaranê ji aliyê hêzên Îranê ve hat kuştin.