Hewlêr (Rûdaw) - Şeva borî li Taxa Bihara Nû ya Hewlêrê ji ber pirsgirêkeke civakî birayekî birayê xwe yê biçûk bi 15 guleyan kuşt.
Li gorî zanyariyên Tora Medyayî ya Rûdawê û gotina xizmên wan, navê birayê ku hatiye kuştin P.M. ye û ew 35 salî bû.
P.M. karmendê Birêvebiriya Şaredariya Hewlêrê bûye û kujer jî birayê wî yê mezin ê 37 salî ye.
Ji ber nîqaşa bi zarokekî re
Xizmên wan li ser sedema derketina şer ji Rûdawê re axivîn.
Li gorî axaftina xizman, êvara sêşemê birayê biçûk ji ber pirsgirêkekê li biraziyê xwe (kurê kujer) hêrs bûye.
Pişt re zarok çûye û rûdan ji bavê xwe re gotiye.
Bavê wî jî bi çekê çûye ser mala birayê xwe û di navbera wan de nîqaş derketiye.
Di encama nîqaşê de birayê mezin dest bi gulebaranê kiriye, 15 gule berdane birayê xwe û ew kuştiye û reviya.
Lê belê hêzên Asayîşa Hewlêrê operasyonek kir û kujer hat desteserkirin.
Berê jî gule berî hev dane
Li gorî şopandina Rûdawê, berê jî di navbera wan her du birayan de pirsgirêkên civakî derketibûn.
Li gorî agahiyan wan di dema borî de jî çend caran gule berî hev dane.
