Hewlêr (Rûdaw) - Serokwezîrê Îraqê Elî Falih Zeydî û Serokkomarê Sûriyeyê Ehmed Şer li Şamê civiyan û aliyan peymaneke nû îmze kir ku rojane heta 2 milyon bermîl petrola Îraqê bi rêya boriya dîrokî ya Baniyasê ber bi Deryaya Spî ve bê hinardekirin.
Ev gava stratejîk piştî girtina Tengava Hurmizê wekî alternatîveke sereke ya ji bo aboriya Îraqê tê dîtin.
Ji bo Hurmizê alternatîva herî girîng
Şerê navbera Amerîka û Îranê û girtina Tengava Hurmizê zererên mezin gihandin hinardekirina petrola Îraqê, ji ber ku Bexdayê beşa herî zêde ya petrola xav di wê rêya deryayî re dişand.
Ji bo çareserkirina vê qeyranê, hikûmeta Îraqê berê xwe da nûjenkirina boriya Hedîsa-Baniyasê ku dîroka wê vedigere sala 1925an.
Tê pêşbînîkirin ku ev proje aboriya her du welatan dê li hemberî qeyranên herêmî biparêze.
Piştgiriya Amerîkayê û pişka Chevronê
Wezareta Karên Derve ya Amerîkayê piştgiriya xwe ji bo vê peymana stratejîk diyar kir. Tê çaverêkirin ku konsorsiyûmeke navneteweyî ya di bin serokatiya şirketa enerjiyê ya Amerîkayî Chevron de karên teknîk û darayî yên nûjenkirina boriyê bigire ser xwe.
Her çend ji ber sedemên ewlehî û lojîstîk pêkanîna vê projeyê çend salan bikişîne jî armanca herî pêşî ew e ku rojane 2 milyon bermîl petrol werin veguhastin.
Hevkariya aborî û ewlehiya sînoran
Ji bilî mijara enerjiyê, li Şamê mijarên wekî zêdekirina bazirganiya dualî, bipêşxistina çandiniyê û parastina sînoran a ji DAIŞê û komên neyasayî ji aliyê şandeyên her du welatan ve hatin gotûbêjkirin.
Zeydî ragihand ku Îraqî û Sûriyeyî "yek gel in, tenê welatên wan cuda ne" û daxwaza xurtkirina pêwendiyan kir.
