Hewlêr (Rûdaw) - Li Tirkiye û Bakurê Kurdistanê rêziknameya ku sînordarkirina emir li ser torên civakî ferz dike ji îro pê ve ket meriyetê.
Li gorî biryara nû, zarokên ku emrê wan di bin 15 saliyê re ye êdî nikarin li ser torên civakî hesabên nû vekin.
Kesên ku dixwazin hesabekî nû vekin, divê emrê xwe bi rêya sîstema e-devletê piştrast bikin.
Hesabên heyî jî divê heta 31ê Adara 2027an emrê xwe piştrast bikin, eger neyê kirin dê bên girtin.
Ev rêzikname ji aliyê Serokatiya Ewlehiya Sîber a Serokkomariya Tirkiyeyê ve hatiye amadekirin û 10ê Çiriya Pêşîn di Rojnameya Fermî de hatibû belavkirin.
Rêzikname îro bi awayekî fermî ket warê meriyetê.
Biryar hemû torên civakî yên ku li Tirkiye û Bakurê Kurdistanê tên bikaranîn li xwe digire.
Pêşkêşkarên van platforman êdî nikarin xizmetê bidin zarokên ku 15 saliya xwe temam nekirine.
Her wiha ji bo ciwanên di navbera 15 û 17 saliyê de jî li ser nepenî, şandina peyaman û weşanên zindî şert û mercên taybet hatine diyarkirin.
Piştrastkirina emir a bi rêya e-devletê
Li gorî xala 7an a rêziknameyê, karê piştrastkirina emir tenê bi rêya e-devletê tê kirin.
Dema ku bikarhêner bixwaze hesabekî nû veke, Serokatiya Ewlehiya Sîber li ser e-devletê kodekê jê re çêdike.
Bikarhêner vê koda taybet li platforma ku dixwaze hesabê lê veke dinivîse.
Platformên torên civakî bi vê kodê tenê pê dihesin bê ka bikarhêner 15 saliya xwe temam kiriye yan na.
Eger temam kiribe, dê bizanibin ka gihîştiye 18 saliya xwe yan na.
Platform nikarin vê kodê ji bilî piştrastkirina temen ji bo tiştekî din bi kar bînin.
Ji bo hesabên heyî dema dawî: 31ê Adara 2027an
Bikarhênerên ku beriya vê rêziknameyê hesab vekirine û temenê xwe piştrast nekirine, divê heta 31ê Adara 2027an temenê xwe bi heman rêbazê piştrast bikin.
Eger derkeve holê ku xwediyê hesabekî di bin 15 saliyê de ye, platform agahiyê dide wî kesî û hesabê wî digire.
Bikarhêner dikarin bê pere îtirazî encama piştrastkirinê yan jî girtina hesabê xwe bikin.
Heta ku encama îtirazê bi awayekî fermî diyar dibe, ti naverok, wêne û agahiyên kesane yên di nav hesab de nayên jêbirin.
Şertên ji bo ciwanên 15-17 salî
Hesabên ciwanên di navbera 15 û 17 saliyê de bi tevahî veşartî dibin.
Platform nikarin vebijarka "ji her kesî re vekirî" pêşkêşî van hesaban bikin.
Rêgezên ku ji bo vê komê hatine diyarkirin ev in:
• Ciwan tenê dikarin ji wan kesên ku wan dişopînin peyaman wergirin.
• Kesên din nikarin lîsteya şopînerên wan û kesên ku ew wan dişopînin bibînin.
• Ciwanên vê komê nikarin li ser hesabên xwe weşana zindî vekin.
• Agahiyên kesane yên van zarokan ji bo çêkirina profîlan an jî pêşkêşkirina reklamên bazirganî nayên bikaranîn.
Kontrola dê û bavan
Platform neçar in amûrên kontrolê bidin destê malbatan.
Bi vê rêyê dê û bav dikarin dema ku zarokên wan li ser torên civakî derbas dikin bişopînin û sînordar bikin.
Kirîn, kirêkirin û endamtiyên bi pere yên li ser platforman tenê bi erêkirina malbatê pêk tên.
Her wiha dê û bav dikarin ji bo xerckirinên zarokên xwe sînorekî madî diyar bikin.
