Hewlêr (Rûdaw) - Serokkomarê Îsraîlê Isaac Herzog dê piştî hilbijartinan biryarê bide bê ka dê erkê avakirina hikûmetê bide kîjan namzedî.
Di hilbijartinan de ne bloka bi serokatiya Serokwezîr Benjamin Netanyahu û ne jî bloka hevrikê wî Gadi Eisenkot piraniya parlamentoyê bi dest xist.
Serokkomarê Îsraîlê Isaac Herzog ji bo diyarkirina namzedê ku dê erkê avakirina hikûmeta koalîsyonê ya nû wergire, îro bi nûnerên partiyên siyasî re dest bi şêwiran dike.
Biryara ku Herzog bide gelekî girîng e. Çimkî di hilbijartinan de her du blokên sereke jî nekarîn bi tena serê xwe piraniyê bi dest bixin.
Ne şert e ku Herzog erkê avakirina hikûmetê bide serokê partiya ku herî zêde kursî standine.
Ew dê biryara xwe li gorî wî namzedî bide ku îhtimala wî ya avakirina piraniya parlamentoyê herî zêde ye.
Herzog destnîşan kir ku divê ji bo rêlibergirtina hilbijartinên nû hemû hewl werin dayîn.
Wî piştî hilbijartinan got, “Ez li bendê me ku her kesê bê vê derê xwedî ramaneke vekirî be.”
Peyama serxwebûnê ya li hemberî zextên derve
Herzog qebûl kiribû ku ew dê beriya hilbijartinên 27ê Çiriya Pêşîn rastî zexteke giran bê.
Wî diyar kiribû ku ew dê rê nede ti aktorên derve, bi taybetî jî Serokê Amerîkayê Donald Trump ku bandorê li biryara wî bike.
Herzog ji medyaya Amerîkayê re daxuyaniyek da û got
“Ez nafikirim ku Serokê Amerîkayê yan jî ti kesekî din bandorê li biryara min bike.
Ev mijareke têkildarî demokrasî û destûra Îsraîlê ye. Tenê ev yek ji bo min girîng e.”
Serokkomar da zanîn ku ew dê ji bo rêlibergirtina hilbijartinên nû çi ji destê wî bê bike.
Di vê çarçoveyê de tê nirxandin ku dibe ew piştgiriyê bide avakirina hikûmeteke yekîtiya neteweyî ya di navbera Netanyahu û Eisenkot de.
Herzog, ji ber dozên gendeliyê yên Netanyahu yên ku demeke dirêj e didomin, rastî zexta Trump a ji bo efûkirina wî jî hat.
Eger Netanyahu desthilatê ji dest bide, îhtîmal heye ku bikeve girtîgehê.
Herzog, nîsana borî parêzerên Netanyahu û dozger vexwendibûn rûniştgeha xwe da ku li ser mijarê biaxivin.
Paşxaneya siyasî û malbatî ya Herzog
Isaac Herzogê 66 salî, sala 2021ê piştî piştgiriyeke mezin a li parlamentoyê dest bi erkê serokkomariyê kir.
Wê demê Yair Lapidê ku îro di eniya mixalefetê ya Eisenkot de cih digire, pesnê Herzog dabû.
Lapid gotibû, “Mirovekî rêzdar û bijarte ye ku her tim qenciya welatê xwe û gelê Cihû dixe pêş.”
Herzog beriya ku bibe serokkomar, sala 2003yan ji bo Parlamentoya Îsraîlê hat hilbijartin.
Ew di wezaretên nîştecihbûn û xizmetguzariyên civakî de xebitî.
Sala 2015an jî wekî serokê Partiya Karkeran a çepê navend, li hemberî Netanyahu ket pêşbirka serokwezîrtiyê.
Netanyahuyê 77 salî, bû serokwezîrê Îsraîlê yê ku herî zêde li ser kar maye û nêzîkî bîst salan welat bi rê ve bir.
Hilbijartinên dawî, wekî referandumekê ya li ser desthilata Netanyahu jî hatin nirxandin.
Netanyahu bi wê yekê tê rexnekirin ku welêt ber bi xeteke rastgirtir ve dibe.
Piştî êrişa Hemasê ya 7ê Çiriya Pêşîn a 2023yan, li herêmê pêvajoyeke şer a berfireh çêbû.
Pêşhatên herêmî û hevdîtinên bi Libnanê re
Herzog, adara borî ji AFPê re daxuyaniyek dabû.
Wî şerê ku Amerîka û Îsraîlê bi Îranê re dikir wekî “xaleke werçerxanê ya dîrokî” pênase kiribû.
Herzog gotibû, “Piştî şerên bêdawî, xwînrijandin û terora ku zêdetirî nifşekî didome, dê demek bê ku pirsgirêka bingehîn a ji Tehranê tê biqede û hemû arasteya herêmê biguhere.”
Serokkomarê Îsraîlê bal kişandibû ser girîngiya avakirina diyaloga bi Libnanê re jî.
Her du alî meha paşê ji bo hevdîtinên rasterast hatibûn cem hev û têkilî ji wê demê ve didomin.
Malbata wî jî di siyaseta Îsraîlê de rolên girîng girtin
Bavê Isaac Herzogê ku li Îrlandayê ji dayîk bûye Haim Herzog e.
Haim Herzog di paşerojê de serokatiya îstixbarata leşkerî ya Îsraîlê kir.
Haim Herzogê ku piştre bû Balyozê Îsraîlê yê Neteweyên Yekbûyî, di navbera salên 1983 û 1993yan de wekî serokkomarê 6an ê welêt xebitî.
Bapîrê Herzog Haham Yitzhak Halevi Herzog jî serhahamê yekem ê Aşkenaziyan ê Îsraîlê bû.
