Hewlêr (Rûdaw) - Girtiya Kurd a ji Efrîna Rojavayê Kurdistanê Lamia Asu piştî 32 salan ji girtîgeheke Îzmîrê hat berdan.
Hêzên ewlehiyê Lamia Asu piştî berdanê ji bo dersînorkirinê bir Navenda Vegerandinê ya Harmandaliyê ya Îzmîrê.
Lamia Asu sala 1992yan li parêzgeha Sêrtê ya Bakurê Kurdistanê hatibû desteserkirin û bi hinceta “têkdana yekîtî û yekparçebûna dewletê” cezayê heta hetayê lê hatibû birîn.
Berdana wê salek û 7 mehan hatibû bipaşxistin
Lamia Asu cezayê xwe temam kiribû lê berdana wê bi giştî salek, 7 meh û 15 rojan bi hincetên wekî "mixalefeta li dijî karmendên girtîgehê" hat bipaşxistin.
Li gorî nûçeya MAyê, Lamia Asu 6ê Çiriya Pêşîn ji Girtîgeha Jinan a Şakranê ya Îzmîrê hat berdan û ew niha li Navenda Vegerandinê ya Harmandaliyê tê girtin.
Tê payîn ku Tirkiye Lamia Asuyê dersînor bike û wê bişîne Sûriyeyê.
