Hewlêr (Rûdaw) - Li bajarokê Kefer Texarîmê yê Îdliba li bakurê rojavayê Sûriyeyê, di teqîna depoyeke cebilxaneyê de 5 kesan mirin û 9 kes jî birîndar bûn.
Çavkaniyên xwecihî diyar kir ku teqîn dema xebatên li depoyê rû daye û derbarê bûyerê de dest bi lêpirsînê hatiye kirin.
Rewangeha Mafên Mirovan a Sûriyeyê (SOHR) da zanîn ku teqîn li Kefer Texarîmê li depoyeke çekan a li nêzîkî dibistanekê pêk hatiye.
SOHRê ragihand ku gelek kes birîndar bûne, ambûlans çûne herêmê û birîndar veguhastine nexweşxaneyê.
SOHRyê eşkere kir ku xebatên hêzên ewlehiyê yên ji bo “piştrastkirina sedemên teqînê û diyarkirina aliyê berpirs” berdewam dikin.
Li gorî agahiyên ku SOHR dispêre çavkaniyên xwecihî, sedema teqînê depoyeke cebilxaneyê ya komeke çekdar e ku li herêmeke qerebalix çalakiyan dike.
