Hewlêr (Rûdaw) - Rewangeha Mafên Mirovan a Sûriyeyê (SOHR) ragihand ku di Çiriya Paşîn a 2025an de li Sûriye û Rojavayê Kurdistanê 232 kes hatine kuştin. Piraniya qurbaniyan sivîl in.
SOHRê bîlançoya mehane ya şer û tundiya li Sûriyeyê eşkere kir.
Li gorî raporê, meha borî 232 kes hatine kuştin û 200 ji wan sivîl in.
Di nava sivîlên hatine kuştin de 20 jin û 31 zarok hene.
Sedemên kuştina sivîlan
Di raporê de hûrgiliyên kuştina sivîlan wiha hatin rêzkirin:
Cînayet: 57 sivîl (2 zarok û 10 jin) hatin kuştin.
Çekdarên nenas: 37 sivîl (2 jin) ji aliyê çekdarên nenas ve hatin kuştin.
Şert û mercên nediyar: 26 sivîl (2 zarok û 2 jin) di bin şert û mercên nediyar de hatin kuştin.
Bermahiyên şer: 24 sivîl (18 zarok) ji ber teqîna cebilxaneyên kevn û bermahiyên şer hatin kuştin.
Şerê navxweyî: 16 sivîl (6 zarok û jinek) di şer û pevçûnên navxweyî û gulebarana kor de hatin kuştin.
Înfaz: 12 sivîl (3 jin) bêyî darizandin hatin înfazkirin.
Birêvebiriya Operasyonên Leşkerî: 10 sivîl bi guleyên endamên Birêvebiriya Operasyonên Leşkerî hatin kuştin.
Îsraîl: 7 sivîl (2 zarok û 2 jin) di bombebaranên Îsraîlê de hatin kuştin.
Mayîn: 4 sivîl (zarokek) ji ber teqîna mayîn û teqemeniyan hatin kuştin.
Sînorê Urdinê: 3 sivîl ji aliyê pasevanên sînor ên Urdinê ve hatin kuştin.
Artêşa Niştimanî: 2 sivîl ji aliyê komên "Artêşa Niştimanî" ve hatin kuştin.
Koalîsyon: Sivîlek di êrişa asmanî ya Koalîsyona Navneteweyî de hat kuştin.
Yên din: Sivîlek jî di bin şert û mercên din de hat kuştin.
Kuştina 32 leşker û çekdaran
SOHRê da zanîn ku xeynî sivîlan 32 kesên din jî hatine kuştin ku nasnameya wan wiha ye:
- Endamên Birêvebiriya Operasyonên Leşkerî: 26
- Hêzên Sûriyeya Demokratîk (HSD): 4
- Komên mixalif û Îslamî: 1
- Çekdar: 1
SOHRê di dawiya rapora xwe de bangî civaka navneteweyî kir ku ji bo rawestandina xwînrijandina li Sûriyeyê bixebite û bal kişand ser belgekirina binpêkirin û sûcên şer kir.
