Hewlêr (Rûdaw) - Birêvebiriya Hevbeş a Encûmena Êl û Rûsipiyan ragihand ku hêzên hikûmeta Sûriyeyê rê nadin sotemenî derbasî taxên Şêx Meqsûd û Eşrefiyeyê yên Helebê bibe û ji ber vê yekê krîzeke mezin a sotemeniyê derketiye.
Li taxên Şêx Meqsûd û Eşrefiyeyê yên bajarê Helebê ku piranî Kurd lê dijîn, ji ber dorpêça hêzên hikûmetê careke din pirsgirêkên mirovî serî hildan.
Endamê Birêvebiriya Hevbeş a Encûmena Êl û Rûsipiyan Îdrîs Şêxo ji Rûdawê re diyar kir ku rêbendên hêzên hikûmeta Sûriyeyê rê nadin ku mazot, benzîn û xaz derbasî taxên wan bibin.
“Tenê rê didin kel û pelên xwarinê xwarinê”
Îdrîs Şêxo da zanîn ku astengî tenê bi sotemeniyê ve sînordar nînin û got:
“Hêzên hikûmeta Sûriyeyê rê nadin keresteyên avahîsaziyê jî derbasî taxên me bibin û tenê rê didin derbasbûna kel û pelên xwarinê.”
Bihayê gazê gihiştiye 450 hezar lîreyî
Li gorî zanyariyên ku Îdrîs Şêxo dane Rûdawê, ji ber vê dorpêç û rêgirtinê, sotemenî li wan taxan zehmet peyda dibe û bihayê wê gelekî zêde bûye.
Hat diyarkirin ku bihayê lîtreya mazotê gihiştiye 12 hezar lîreyên Sûriyeyê û bihayê tûpê gazê jî gihiştiye 450 hezar lîreyên Sûriyeyê.
Her wiha hat ragihandin ku elektrîk li wan taxan hîn qutkirî ye û av jî bi awayekî qutbûyî û car caran tê dayîn.
