Hewlêr (Rûdaw) - Peymana Parastinê ya Hevbeş a Mekeyê ku di navbera Tirkiye, Erebistana Siûdî û Pakîstanê de hatiye îmzekirin, ji bo gotûbêjkirin û pesendkirinê pêşkêşî Parlamentoya Tirkiyeyê hate kirin.
Ev peymana sêalî ku hevkariyeke berfireh a leşkerî dihewîne, niha li Komisyona Karên Derve ya parlamentoyê ye.
Tê çaverêkirin ku 27ê Çiriya Pêşîn a 2026an gotûbêjên li ser vê peymanê di komisyonê de bi dawî bibin û pişt re ji bo dengdanê bişînin Civata Giştî ya parlamentoyê ku hemû partiyên siyasî dê amade bin.
Ev peymana stratejîk ku xalên wekî parastina hevpar, hevkariya leşkerî, pîşesaziya leşkerî û ewlehiya herêmî dihewîne, 7ê Tebaxa 2026an li bajarê Mekeyê di navbera wezîrên her sê welatan de hatibû îmzekirin.
Hevpeymaniya navborî ji 16 madeyan pêk tê û wekî peymaneke daîmî hatiye sêwirandin ku dê heta hetayê di meriyetê de bimîne.
Di çarçoveya peymanê de hatiye diyarkirin ku eger welatek bixwaze jê vekişe, tenê dikare piştî derbasbûna 10 salan vê gavê bavêje û ji bo vê yekê jî divê 3 meh berê welatên din bi awayekî fermî agahdar bike.
Madeyên sereke û mekanîzmaya parastina hevpar
Di nav peymanê de sê madeyên sereke wekî stûnên vê hevpeymaniyê derdikevin pêş. Li gorî madeya duyem, eger êrişek li dijî ax an serweriya yek ji van sê welatan bê kirin, welatên din dê vê gavê wekî êrişeke li ser xwe bipejirînin û bi her awayî bersivê bidin.
Her wiha madeya şeşem maf dide her sê dewletan ku rahênan û tetbîqatên leşkerî yên hevpar bikin, li ser axa hevdu baregehên leşkerî ava bikin û leşkerên xwe li wir bi cih bikin.
Di heman demê de bi madeya heştem mekanîzmayeke daîmî ya parastinê tê avakirin ku ev xal rê dide welatên nû yên ku bixwazin paşerojê bibin endam, karibin tevli vê peymanê bibin.
Li aliyê din, li gorî xalên din ên vê peymanê, her sê dewlet dê polîtîkayên hevpar ên ewlehiyê bimeşînin, di asta herî jor de îstixbaratê bi hev re parve bikin û ji bo parastina serweriya hevdu hevkariyê bikin.
Di peymanê de hat destnîşankirin ku ev hevkariya sêalî dê parastina berjewendiyên endamên koalîsyonên navneteweyî (wekî NATOyê) hêsantir bike ku ev xal rasterast bandorê li ser rewşa Tirkiyeyê dike.
.jpg&w=3840&q=75)
