Hewlêr (Rûdaw) - Serokê Amerîkayê Donald Trump piştî civîna li gel şêwirmendên payebilind ên ewlehiya neteweyî ragihand ku ew dê di demeke nêzîk de li ser destpêkirina şerekî berfireh ê li dijî Îranê biryareke teqez bide.
Trump tekez kir ku Tehran bêyî erêkirina Washingtonê nikare di bernameya xwe ya nukleer de ti gavan bavêje û got:
"Ez naxwazim tiştê ku li Îranê maye wêran bikim lê dibe ku ez neçar bimînim."
Serokê Amerîkayê 5ê Çiriya Paşîn a 2026an li Koşka Spî derbarê wan pêşniyarên ku Tehran gotûbêj dike bersiva pirsên rojnamegeran da û got:
"Ne girîng e ku çi pêşniyarekê gotûbêj dikin, çimkî bêyî erêkirina me nikarin ti tiştî bikin û nabin xwediyê çekên nukleerê.
Ji destpêka hebûna me ya li wir a beriya heft mehan ve, me kontrola hemû wan deveran kiriye ku me dixwest em kontrol bikin."
"Hûn dê di demeke nêzîk de biryarê bibînin"
Trump amaje pê kir ku ew dê di demeke nêzîk de li ser paşeroja rewşê biryarê bidin û got:
"Niha divê em biryarê bidin ka em dixwazin bêtir bi pêş ve herin û bi rêya êrişekê piştrast bibin ku bernameya wan a nukleer ji holê hatiye rakirin û qet ducare nabe yan na?
Heke pêkan be ez naxwazim tiştê ku li wî welatî maye wêran bikim lê dibe ku ez neçar bimînim vê yekê bikim, hûn dê di demeke nêzîk de jî biryarê bizanin."
Pêşniyara duqonaxî ya Qeterê
Hevdem li gel nirxandina bijardeyan a ji aliyê Trump ve, tevgereke xurt a dîplomasiyê li herêmê dest pê kiriye.
Wezîrê Karên Derve yê Îranê Ebas Eraqçî bi navbeynkarên Qeter, Erebistana Siûdî, Tirkiye, Îmarat, Uman û Misirê re gelek pêwendiyên telefonî pêk anîn.
Navbeynkarên Qeterê reşnivîsa pêşniyareke nû pêşkêşî Washington û Tehranê kir ku ji du qonaxan pêk tê:
Di qonaxa yekem de Amerîka dê dorpêça deryayî ya li ser Îranê rake û beşek ji pereyên cemidandî yên Tehranê serbest berde.
Li hemberî vê yekê, Îran dê vexwendnameyeke fermî bide Ajansa Enejiya Atomê ya Navneteweyî da ku vekolerên xwe bişîne wan tesîsên nukleerê yên ku berê hatibûn bombebarankirin.
Piştî wê jî Îran dê Tengava Hurmuzê veke û dan û standinên têkildarî mijara uranyuma dewlemendkirî ya Îranê dest pê bikin.
Peyama Tehranê ya ji bo Putin û 7 merc
Li aliyê din, Sekreterê Encumena Bilind a Ewlehiya Neteweyî ya Îranê Mohsen Rezaî li Moskowê li gel Serokê Rûsyayê Vladimir Putin civiya û peyameke Rêberê Bilind ê Îranê Mucteba Xameneyî gihand wî.
Rezaî piştî hevdîtinê ragihand ku Putin amadebûna xwe ya ji bo navbeynkarî û hevkariya di bidawîanîna şer de nîşan daye û lê tekez kir:
"Me ji Birêz Putin re ragihand ku me di qada dîplomasiyê de 7 merc danîne ber destê Amerîkayiyan.
Heta ku ew her heft mercên me bi cih neyên anîn, ne Tengava Hurmizê dê were vekirin û ne jî ti dan û standinek dê bi Washingtonê re were kirin."
