Hewlêr (Rûdaw) - Platforma çandî û hunerî Chalak Events, bernameya xwe ya yekem a sala 2026an bi mazûvaniya hunermendê navdar ê Kurd Ganî Mîrzo dest pê dike.
Di çarçoveya rêzeçalakiyên "Sihbetên Çayê" de ku gihîştiye bernameya 34an, Ganî Mîrzo dê li ser mijara "Zîryab, Flamenko û Muzîka Kurdî" semînerekê bide.
Çalakî dê sibe demjimêr 17:00an li Nînova Cafeyê ya li Stenbolê bi moderatoriya nivîskar Mewlûd Oguz were lidarxistin.
Beşdar dê di vê çalakiyê de li ser pêwendiya di navbera muzîka Kurdî û Flamenkoyê de zanyariyan wergirin û bi pirsên xwe beşdarî nîqaşê bibin.
Ganî Mîrzo kî ye?
Ganî Mîrzo sala 1968an li Qamişloyê ji dayîk bûye.
Piştî qedandina lîseyê çûye Helebê û du salan li wir beşa muzîkê xwendiye.
Mîrzo paşê vegeriyaye Qamişloyê û mamostetiya muzîkê kiriye.
Hunermendê Kurd piştî leşkeriyê berê xwe daye Ewropayê û 20 sal in li bajarê Barcelonayê yê Katalonyayê dijî û xebatên xwe yên hunerî li wir didomîne.
Chalak Events çi dike?
Chalak Events platformeke serbixwe ye ku navenda wê li Stenbolê ye û armanca wê ew e ku ciwanên Kurd li dora çand, huner û edebiyatê bîne cem hev.
Platform bi taybetî bi rêzeçalakiyên xwe yên bi navê "Sihbetên Çayê" tê naskirin.
Di van çalakiyan de nivîskar, hunermend, akademîsyen û kesayetên naskirî yên Kurd dibin mêvan û li ser mijarên curbicur bi ciwanan re guftûgoyê dikin.
Chalak Events her wiha atolye, pêşangeh û çalakiyên torbendiyê (networking) jî li dar dixe da ku qadeke civakîbûnê ya bi Kurdî ava bike.
🎙☕️ Sihbetên Çayê 34: Ganî Mîrzo.
— Chalak Events (@ChalakEvents) January 2, 2026
Bernameya yekem ya 2026an li pêş we ye!
Di vê bernameya Sihbetên Çayê ya 34em de em ê guhdariya muzîkjen û hunermend Ganî Mîrzo bikin.@ganimirzo | @mevlutoguz #ganîmîrzo #mewlûdoguz #muzîk #ziryab #kurdî #chalakevents pic.twitter.com/HG5VMRzNXD
