Hewlêr (Rûdaw) - Sopranoya Kurd a navneteweyî Pervîn Chakar, xwe amade dike ku bi dengê xwe pireke di navbera çandan de ava bike.
Chakar dê vê mehlê li Amed, Wan û Qersê rêzekonseran li dar bixe û dê awazên kevneşopî yên Kurdî bi muzîka klasîk a Rojava re bîne cem hev.
Duduka Ertan Tekîn dê bi dengê Chakarê re be
Pervîn Chakar dê di 17ê Çiriya Pêşîn de li Amedê, 19ê Çiriya Pêşîn li Wanê û 21ê Çiriya Pêşîn jî li Qersê li Otela 1924ê derkeve ser dikê.
Di konseran de quarteteke ji sazên bi têl û dudukvanê navdar Ertan Tekîn dê bi Chakarê re bin.
Repertuvara Chakarê, kûrahiya hestyarî ya muzîka gelêrî ya Kurdî û dewlemendiya teknîkî ya kevneşopiya operaya Rojava tîne cem hev û soza şeveke bêhempa dide hezkiriyên muzîkê.
Parçeyek ji turneyeke navneteweyî
Ev rêze konser, qonaxa Rojhilata Navîn a turneya payîza 2025an a Chakarê pêk tînin.
Hunermenda Kurd, piştî konserên li Bakurê Kurdistanê dê di 14ê Çiriya Paşîn de li Munîhê û di 12ê Kanûna Pêşîn de jî li Frankfurtê derkeve ser dikê.
Dengê kûr û bêdem ê dudukê û nazikiya sazên bitêl dê bibin yek û guhdaran di navbera hestan de bigerînin û pireke di navbera muzîka Rojhilat û Rojava de ava bikin.
"Ez operayê bi muzîka Kurdî pêşkêşî gelê xwe dikim"
Pervîn Chakar derbarê projeya xwe de ji Rûdawê re axivî û got:
“Dewlemendiya zimanê Kurdî, sempatîkbûna fonetîka Kurdî, rewanbûn û samîmiyeta wê, wekî zimanê evîn, dil, helbest, melodî û hezkirinê, bandorê li muzîk û çanda me jî dike.
Ji bo bibim yek ji hilgirên çand û hunerê, ez dixwazim operaya ku min perwerdeya wê dîtî, li gel muzîka Kurdî pêşkêşî gelê xwe bikim.
Di konseran de ne tenê bi Kurmancî ez cîh didim berhemên Kirmanckî (Zazakî) û Soranî jî.”
