Hewlêr (Rûdaw) - Nêçîrvan Barzanî, Fermandarê Giştî yê Hêzên Sûriyeya Demokratîk (HSD) Mezlûm Ebdî û şanda pê re qebûl kirin.
Di civînê de pêşhatên dawî yên meydanî û siyasî yên rewşa Sûriye û Rojavayê Kurdistanê, Pirsgirêka Kurdan û peymana di navbera HSD û hikûmeta veguhêz a Sûriyeyê de hatin gotûbêjkirin.
Hevseroka Daîreya Pêwendiyên Derve ya Rêveberiya Xweser Îlham Ehmed û Endama Fermandariya Giştî ya Yekîneyên Parastina Jinê (YPJ) Rohilat Efrîn jî di civînê de amade bûn.
Serokê Herêma Kurdistanê Nêçîrvan Barzanî careke din piştgiriya Herêma Kurdistanê ya ji bo çareseriya aştiyane ya pirsgirêkan nîşan da.
Nêçîrvan Barzanî tekezî li ser girîngiya berdewamiya diyaloga navbera aliyan û “parastina mafên hemû pêkhateyan û gelê Kurd a di çarçoveya Sûriyeyeke yekgirtî de kir.”
Rola Herêma Kurdistanê û têkoşîna li dijî DAIŞê
Mezlûm Ebdî derbarê rewşa herêmê û dan û standinên bi Şam û aliyên navneteweyî re agahî dan.
Mezlûm Ebdî her wiha ji bo rola berdewam a Nêçîrvan Barzanî û Herêma Kurdistanê ya di piştgiriya mafên rewa yên gelê Kurd û hewlên ji bo aramkirina alozî û pirsgirêkan de spasiya wî kir.
Di hevdîtinê de metirsiyên terorê û liv û tevgerên DAIŞê yên li herêmê jî hatin nirxandin.
Her du alî li ser wê yekê hemfikir bûn ku hevahengiya aliyan û piştgiriya Koalîsyona Navneteweyî faktoreke sereke ya parastina ewlehiya herêmê ye.
#WÊNE - Civîna Nêçîrvan Barzanî û Mezlûm Ebdî ya li Hewlêrê
— RudawKurdi (@RudawKurdi) February 5, 2026
☀ Serokê Herêma Kurdistanê Nêçîrvan Barzanî îşev li Hewlêrê bi Fermandarê Giştî Hêzên Sûriyeya Demokratîk (HSD) Mezlûm Ebdî, Hevseroka Daîreya Pêwendiyên Derve ya Rêveberiya Xweser Îlham Ehmed û Endama Fermandariya… pic.twitter.com/S35mDfhC8D