Hewlêr (Rûdaw) - Serokê Herêma Kurdistanê Nêçîrvan Barzanî bi serdaneke fermî gihîşt Almanyayê.
Serokatiya Herêma Kurdistanê di daxuyaniyekê de ragihand ku îşev Nêçîrvan Barzanî ji bo beşdariya Konferansa Ewlehiyê ya Munîhê (MSC) de gihîşt Almanyayê.
Li gorî daxuyaniyê, di konferansê de Serok Nêçîrvan Barzanî dê bi serok û berpirsên payebilind ên welatan û beşdarbûyan re hevdîtinan pêk bîne.
Di civînan de rewşa siyasî û ewlehiyê ya Îraq, Herêma Kurdistanê û bipêşketinên li herêmê bi giştî dê bên nirxandin.
Giringiya Konferansa Munîhê
Konferansa Ewlehiyê ya Munîhê her sal bi beşdariya hejmareke zêde ya serok û berpirsên payebilind ên welatan bi rê ve diçe.
Ev konferans derfetek e ji bo guhertina bîr û rayan li ser mijarên parastin, asayîş, seqamgirî û pirsgirêkên cîhanê.
Her wiha di konferansê de ji bo çareserkirina alozî û pirsgirêkan rêkarên guncav tên gotûbêjkirin.
Konferansa Munîhê li cîhanê wekî yek ji giringtirîn konferansên ewlehiyê tê naskirin.
Beşdar li ser mijarên hestiyar ên parastina cîhanê dan û standinan dikin. Îsal konferans dê di navbera 13-15ê Sibatê de bê lidarxistin.
Hinek ji serok û serkirdeyên cîhanê yên ku îsal beşdarî konferansê dibin ev in:
Nêçîrvan Barzanî - Serokê Herêma Kurdistanê
Keir Starmer - Serokwezîrê Brîtanyayê
Emmanuel Macron - Serokkomarê Fransayê
Marco Rubio - Wezîrê Karên Derve yê Amerîkayê
Friedrich Merz - Şêwirmendê Almanyayê
Mark Carney - Serokwezîrê Kanadayê
Mark Rutte - Sekreterê Giştî yê NATOyê
Ursula von der Leyen - Seroka Komîsyona Ewropayê
Gustavo Francisco - Serokê Kolombiyayê
Volodymyr Zelenskyy - Serokê Ukraynayê
Christine Lagarde - Seroka Banka Navendî ya Ewropayê
Donald Tusk - Serokwezîrê Polonyayê