Hewlêr (Rûdaw) - Li parêzgehên Dîlok, Semsûr û Kilîsê yên Bakurê Kurdistanê ji ber barana gur lehî rabû.
Ji ber lehiyê cade, kolan, mal û kargeh di bin avê de man.
Saziya Keşnasiyê ya Tirkiyeyê îro ji bo 16 parêzgehên Bakurê Kurdistanê hişyariya barana gur dabû.
Piştî vê hişyariyê, li parêzgehên Dîlok, Semsûr û Kilîsê baraneke zêde bariya û lehî rabû.
150 malan zerer dît
Li hinek gundên navçeya Nurdaxiyê ya Dîlokê çeman di ser re avêt.
Ji ber rabûna avê rê, mal û kargeh di bin avê de man.
Muxtarê Gundê Dunekê Umit Kaçakçi ragihand ku ji ber lehiyê 150 malan zerer dîtiye.
Otomobîl asê man
Li navenda Semsûrê jî piştî barana gur lehî rabû.
Ji ber lehiyê rê hatin girtin û gelek otomobîl di nav avê de asê man.
Li Kilîsê jî di saetên êvarê de baran zêde bû û lehî rabû.
Ji ber lehiyê cade û kolan di bin avê de man û di çûn û hatina trafîkê de pirsgirêk çêbûn.
Li 16 parêzgehan hişyarî
Saziya Keşnasiyê ya Tirkiyeyê îro ji bo parêzgehên Riha, Semsûr, Çewlîg, Mûş, Bedlîs, Colemêrg, Meletî, Xarpêt, Mêrdîn, Amed, Êlih, Sêrt, Şirnex, Dîlok, Mereş û Kilîsê yên Bakurê Kurdistanê hişyariya barana gur dabû.
