Hewlêr (Rûdaw) - Serokê Herêma Kurdistanê Nêçîrvan Barzanî û şandeyeke Almanyayê behsa rûdanên li Sûriye û Rojavayê Kurdistanê kir.
Serokê Herêma Kurdistanê Nêçîrvan Barzanî, Wezîrê Dewletê yê Wezareta Karên Derve ya Almanyayê Geza Andreas von Geyr û şanda pê re qebûl kirin.
Şandeya Almanyayê di civînê de tekez kir ku welatê wan giringiyeke mezin dide aramiya Îraq û Herêma Kurdistanê.
Civîn îro li Hewlêrê çêbû û Serokatiya Herêma Kurdistanê li ser naveroka civînê daxuyaniyek belav kir.
Li gorî daxuyaniyê, di civînê de pêşxistina pêwendiyên Almanyayê yên bi Îraq û Herêma Kurdistanê re hat gotûbêjkirin.
Her wiha rûdanên dawî yên siyasî yên li Îraq û Herêma Kurdistanê, pêwendiyên Hewlêr û Bexdayê û rewşa giştî ya herêmê hatin nirxandin.
"Almanya dixwaze hevkariyê bidomîne"
Şandeya Almanyayê diyar kir ku aramiya Îraq û Herêma Kurdistanê ji bo Almanyayê girîng e.
Şandeyê xwesteka xwe ya ji bo berdewamiya hevkariya hevbeş a di warên cuda de anî zimên.
Serokê Herêma Kurdistanê Nêçîrvan Barzanî spasiya Almanyayê kir ji ber alîkarî û piştevaniya ku di her warî de pêşkêşî Herêma Kurdistanê kiriye.
Girîngiya aştiyê
Nêçîrvan Barzanî bal kişand ser girîngiya çareserkirina pirsgirêkan a bi rêyên aştiyane.
Serokê Herêma Kurdistanê her wiha tekezî li ser parastina aramî û îstiqrara herêmê kir.
Balyozê Almanyayê yê Îraqê û Konsulê Giştî yê Almanyayê yê Herêma Kurdistanê jî di civînê de amade bûn.
Gefên DAIŞê, rewşa dawî ya Sûriye, Rojavayê Kurdistanê û mijarên din ên herêmî yên ku her du alî giringiyê didinê di civînê de hatin gotûbêjkirin.