Hewlêr (Rûdaw) - Fermangeha Çandiniyê ya Kerkûkê biryar da ku hemû ew peymanên çandiniyê yên ku dikevin çarçoveya Madeya 29an a sala 2012an, li ser zeviyên çandiniyê yên sînorê parêzgehê bên betalkirin.
Li gorî nivîsa fermî ya ku doh derketiye, ferman ji hemû şaxên çandiniyê yên (Şiwan, Qerehencîr, Leylan, Pirdê, Sergeran, Beşîr, Yayçî û Navenda Bajêr) re hatiye şandin.
Di fermanê de hatiye xwestin ku ew peymanên ku Madeya 29an wan li xwe digire, werin betalkirin.
"Gaveke girîng e"
Serokê Komîteya Çandiniyê ya Encûmena Parêzgeha Kerkûkê Ebdula Mîrweys ji Rûdawê re axivî û got:
"Ev ji bo pêkanîna Biryara 29an gaveke girîng e. Berê li Encûmena Wezîran biryar li ser hatibû dayîn û piştre Wezareta Dadê ya Îraqê ku wezîrê wê Xalid Şiwanî ye, ji bo pêkanîna wê kar kir."
Zeviyên ku hatibûn dagirkirin
Ebdula Mîrweys diyar kir ku pirsgirêkên wan ên mezin li deverên Sergeran, Daqûq û Leylanê hene û wiha dewam kir:
"Pirsgirêk li ser wan zeviyan e ku biryara 'Etfa'yê (vemirandin/betalkirina mafê xwedîtiyê) wan li xwe digire.
Ew zevî di serdema rejîma Beasê de bi biryara Komîteya Karûbarên Bakur a hilweşiyayî, ji Kurd û Tirkmenan hatibûn standin û peyman ji bo Ereban li ser hatibûn çêkirin."
700 hezar donim erd
Mîrweys destnîşan kir ku ew wekî Komîteya Çandiniyê bi hûrgilî çavdêriya betalkirina wan peymanan dikin ku piraniya wan ji bo "Erebên hawirde" hatine kirin.
Li gorî agahiyan, rûberê giştî yê wan zeviyên ku biryar wan li xwe digire nêzîkî 700 hezar donim e.
Piraniya van erdan milkê Kurdan e û beşek jî milkê Tirkmenan e.
Serokê Komîteya Çandiniyê di dawiyê de ragihand, di vê qonaxê de ku peyman hatin betalkirin, divê dest bi pêkanîna karûbarên tapoyê were kirin, ji bo wan cotkarên ku berê tapo li ser navê wan bûye.