Hewlêr (Rûdaw) - Li parêzgeha Wanê ya Bakurê Kurdistanê bi hezaran kes ji bo piştevaniya Rojavayê Kurdistanê daketin kolanan û meşiyan.
Ji destpêka êrişên Artêşa Ereban a Sûriyeyê yên li Rojavayê Kurdistanê ve, xelkê Bakurê Kurdistanê rojane xwenîşandan û çalakiyan li dar dixin.
“Bi hezaran kes daketin qadan”
Li Wanê îro bi pêşengiya Platforma Saziyên Demokratîk a Wanê ji bo şermezarkirina êrişên Artêşa Ereban a Sûriyeyê yên li dijî Kurdên Rojavayê Kurdistanê çalakiyek hat lidarxistin.
Sermayeyek tund hebû lê dîsan jî bi hezaran kes beşdarî meşê bûn.
Piştgiriya ji balkon û pencereyan
Hevserokê DBPyê, parlamenterên DEM Partiyê yên Wanê, şaredarên navçeyên Wanê yên DEM Partiyê û nûnerên saziyên sivîl beşdarî çalakiyê bûn.
Li ser rêya meşê gelê Wanê jî ji pencere û balkonên xwe bi dirûşman piştgirî da xwenîşandanê.