Hewlêr (Rûdaw) - Dayik Kurd a Êzidî ku ji aliyê DAIŞê ve hatibûn revandin, li Tirkiyeyê hatin rizgarkirin û vegeriya Şingalê.
Ofîsa Rizgarkirina Revandiyên Destê DAIŞê ragihand ku dayik û keçeka xwe li Tirkiyeyê hatine rizgarkirin.
Nûçegihana Rûdawê ya Şingalê Edla Bekirê got "Piştî ku ew dayik û keç li Tirkiyeyê hatin rizgarkirin, îro nêzîkî saet 15:00an radestî malbat û kesûkarên wan hatin kirin."
Nûçegihana Rûdawê her wiha got, "Malbata wê dayik û keçê niştecihên gundê Hatemiyê yê Şingalê ne û vegeriyane wê derê."
Li aliyê din, Berpirsê Ofîsa Rizgarkirina Revandiyên Destê DAIŞê Husên Qaîdî ku ser bi Ofîsa Taybet a Serokê Herêma Kurdistanê Nêçîrvan Barzanî ve ye, îro ji Rûdawê re got:
"Ew dayik û keç beriya 12 rojan hatibûn rizgarkirin û îro radestî malbata wan hatin kirin."
Sûad Xelef û keça wê ya 11 salî, îro di merasîmekê de li Şingalê radestî malbata wan hatin kirin.
Sûad Xelefê kêfxweşiya xwe wiha anî ziman:
"Spas ji Xwedê re piştî 11 salan ez gihîştim malbata xwe. Ez gelekê kêfxweş im ku ez û keça xwe rizgar bûn."
Li gorî amara dawî ya Ofîsa Rizgarkirina Revandiyên Destê DAIŞê, piştî 11 salan di ser komkujiya Êzidiyan a li Şingal û derdora wê re, heta îro zêdetirî 2 hezar û 500 Kurdên Êzidî winda ne û bi dehan hezar jî koçber û koçber in.
Li gorî amaran, "Heta îro 325 hezar û 197 Kurdên Êzidî li kampan an deverên cuda yên Herêma Kurdistanê ne.
Her wiha hejmara koçberên Êzidî yên ku niha li kampên Herêma Kurdistanê ne 135 hezar û 860 kes in."
Di êrişa çekdarên DAIŞê ya li Şingal û derdora wê ya 3yê Tebaxa 2014an de, 6 hezar û 417 Kurdên Êzidî hatin revandin ku 3 hezar û 548 ji wan mêr û 2 hezar û 869 ji wan jin bûn.
Di amarên Ofîsa Rizgarkirina Revandiyên Destê DAIŞê de wiha hat gotin:
"Yên ku heta îro hatine rizgarkirin 3 hezar û 592 kes in; hezar û 212 jin û 339 mêr; hezar û 77 keçên zarok û 964 kurên zarok."
.jpg&w=3840&q=75)