Hewlêr (Rûdaw) - Çavkaniyeke ji Wezareta Karên Navxwe ya Sûriyeyê ragihand ku ji destpêka şerê Helebê ve zêdetirî 300 welatiyên Kurd ji aliyê hikûmeta Şamê ve hatine desteserkirin.
Berpirsê Wezareta Karên Navxwe ya Sûriyeyê ji Ajansa Nûçeyan a Fransayê (AFP) re axivî û îdia kir ku kesên hatine desteserkirin şervan û endamên Hêzên Ewlehiya Hundirîn in (Asayîş) ku her du taxên Kurdan diparastin.
Heman çavkaniyê eşkere kir ku 400 şervanên Kurd ji taxên Şêx Meqsûd û Eşrefiyeyê ber bi herêmên Rêveberiya Xweser ve hatine veguhastin.
Berpirsê ku nexwest navê wî were eşkerekirin ji AFPyê re got, "360 şervanên Kurd li gel 59 birîndaran" ji Taxa Şêx Meqsûdê ber bi herêmên Rêveberiya Xweser hatine veguhastin.
"Ji bo rêlibergirtina komkujiyê vekişiyan"
Hêzên Asayîşê yên taxên Şêx Meqsûd û Eşrefiyeyê ragihand ku tenê sedema razîbûna wan a bi agirbest û vekişînê, rizgarkirina wan nexweşan bûye ku li Nexweşxaneya Xalid Fecr asê mabûn.
Li gorî daxuyaniya Asayîşê, hêzên hikûmetê û dronên Tirkiyeyê bi çekên giran nexweşxane bombebaran dikirin, lewma ji bo rêlibergirtina komkujiyê ew neçar mane herêmê vala bikin.
Rewşa xelkê xerab e: 155 hezar kes koçber bûn
Şer û pevçûnên li Helebê bandoreke giran li ser sivîlan kir.
Qurbanî: Zêdetirî 30 kesan canê xwe ji dest daye ku di nav wan de jin û zarok jî hene.
Koçberî: Parêzgarê Helebê ragihand ku 155 hezar kesan malên xwe terikandine.
Malbat ji hev qut bûn: Jineke bi navê Nahîde diyar kir ku ew li derve ye û sê zarokên wê di nav taxan de asê mane û nikare wan derxîne.
Tohmetbarî û sedemên şer
Rêveberiya Xweser radigihîne ku ev şer planeke Tirkiye û komên çekdar bûye da ku Kurdan ji Helebê derxînin û cihê wan bi xelkê din tije bikin.
Her wiha Rêveberî komên çekdar bi şêwandina termên kuştiyan tohmetbar dike.
Şer piştî wê yekê derket ku dan û standinên di navbera Kurdan û hikûmeta nû ya Sûriyeyê de têk çûn.
Li gorî zanyariyan, biryar bû bi peymanekê hêz tevlîhev bibin lê hikûmetê şertên Kurdan ên ji bo "xwebirêvebirinê" red kirin.
Niha Amerîka hewl dide her du aliyan li hev bîne û rewşê aram bike.
