Hewlêr (Rûdaw) - Li navçeya Gebzeyê ya Kocaeliyê avahiyeke 7 qatî rûxiyabû û malbatek di bin de mabû. Herî dawî termên dê û bav jî hatin dîtin.
Avahî doh serê sibehê saet derdora 07:00an li Taxa Mevlanayê rûxiyabû.
Dê Emîne, bav Levent û zarokên wan Muhammet Emîr, Hayrunnîsa û Dîlara di bin kavilan de mabûn.
Xebatên tîman tevahiya rojê û bi şevê jî berdewam kir.
Tîman, doh piştî nîvro termê Muhammet Emîrê 12 salî û piştî demeke kurt jî termê xwişka wî Hayrunnîsaya 14 salî dîtin.
Zaroka mezin a malbatê, Dîlaraya 18 salî piştî xebatên ku nêzîkî 8 saetan ajot ji bin enqazê sax hat derxistin.
Tîman Dîlaraya ciwan a ku hat zanîn hişê wê li serê wê ye û rewşa wê ya tenduristiyê baş e bir nexweşxaneyê.
Piştî zarokan, tîman xebatên xwe ji bo rizgarkirina dê û bav zêde kirin.
Piştî xebatên ku heta êvarê û bi şev berdewam kir, piştî nêzîkî 19 saetan tîman pêşî termê bav Levent û piştî demeke kurt jî termê dê Emîneyê dîtin.
Cenazeyên dê û bav birin morga Nexweşxaneya Dewletê ya Gebze Fatîhê.
Alîkarê Wezîrê Karên Navxwe Mehmet Aktaş ji rojnamegeran re got:
"Mixabin 4 endamên malbata me ya 5 kesî mirin.
Tenê keça me Dîlara, keça mezin a 18 salî, sax hat derxistin lê mixabin endamên din ên malbatê, dê, bav û 2 zarok mirin."
