شەوکەت هەرکی

لە ئەیلوولی 2013ەوە لە تۆڕی میدیایی رووداو كاردەكات. خولی راهێنانی پەیامنێری لە رووداو بینیوە. لە بەشداریكردنە راستەوخۆیەكانیدا لە بوولتەنی هەواڵەكانی رووداودا زانیاری زۆر و ورد دەدات لەسەر مژار و رووداوی باسكراو. كوردییەكی پاراوی هەیە و ڤیتییەكانی پڕن لە زانیاری روون. 
رووماڵكردنی بەرفراوانی شەوكەت هەركی لە ئەنقەرەی پایتەختی توركیا لە شەوی 15ی تەممووزی 2016دا لەكاتی كودەتا شكستخواردووەكەی توركیا، لە میدیا جیهانییەكاندا دەنگیدایەوە، دیمەنەكانی ئەوشەوە لەلایەن چەند ئاژانس و چەندان تەلەڤزیۆن لە جیهانەوە لە رووداو وەرگیران. ژیانی شەوكەت و وێنەگرەكەی چەند جارێك كەوتە مەترسییەوە بەهۆی نزیكییان لە پێكدادانی نێوان كودەتاچییان و لایەنگرانی دەسەڵات. 
لە ساڵی 2015 رووماڵی شەپۆڵی كۆچی كوردستانیانی لە باشوور و رۆژئاوای كوردستانەوە كرد بۆ توركیا وەك وێستگەی گەیشتن بە ئەوروپا. ئازار و مەینەتی كۆچ و سەختی رێگەی كۆچكردنی لە چەند ڤیتییەكدا خستنەڕوو. ڤیتییەكی لەسەر چیرۆكی خنكانی ئالان كوردی لە شوێنی خنكانەكەی لە كەنارەكانی دەریای ئیجە لە ئیزمیر ئامادەكرد. 

شەوكەت رووماڵی شەڕی پارتی كرێكارانی توركیا و سووپای توركیای لە ساڵی 2015 لە گەڤەر كرد. رووداو یەكەم دەزگای میدیایی بوو كە دوای هەڵگیرسانی شەڕ چووە نێو شارەكە، چەندین ڤیتی لەسەر وێرانبوونی شارەكە و ئاوارەبوونی خەڵكەكی ئامادەكرد. لەسەر ئەو رووماڵەی رووداو، خەڵكی گەڤەر بە لێدوان و شێوەی جیاجیا سوپاسی رووداویان كرد. 
 لە حوزەیرانی 2018 رووماڵی ئۆپەراسیۆنی مەرتاڵی فوڕاتی لە سنووری نێوان باكوور و رۆژئاوای كوردستان كرد. لە ئاداری 2018 بۆ ماوەی 12 رۆژ لە سەر سنووری نێوان باكوور و رۆژئاوای كوردستان بەردەوام رووماڵی هێرشی سووپای توركیا و چەكدارانی ئۆپۆزیسۆنی سووریای كرد بۆ سەر عەفرین. 
شەوكەت هەركی، لە 1ی تەممووزی 1981 لە گوندی زێڤكای شەمزینانی سەر بە ویلایەتی جۆلەمێرگی باكووری كوردستان لەدایكبووە. دایكی خەڵكی رۆژهەڵاتی كوردستانە و باوكیشی خەڵكی ئاكرێی باشووری كوردستانە. لە ساڵی 2005 بەكالۆریۆسی لە بەشی رۆژنامەڤانی زانكۆی ئەنقەرە وەرگرتووە.
 لە ساڵی 1996ەوە دەستی بە كاری راگەیاندن كردووە.یەكەم كاری بێژەری هەواڵی وەرزشی بووە لە تەلەڤزیۆنێكی نێوخۆیی شەمزینان. لە رۆژنامەی گۆروونووم و مللییەت كاری كردووە. لە ماڵپەری یوكسەكۆڤا هەبەر و یوكسەكۆڤا گونجەل كاری كردووە. لە تەلەڤزیۆنی TRT 6 سەرپەرشتی بەڵگە فیلمی (شۆپێن لنگا)ی كردووە، لە هەمان تەلەڤزیۆن ئەندامی گرووپی سیناریۆ و راوێژكاری زمانی زنجیرە فیلمی جان و جگەر بووە.
شەوكەت جگە لە زمانی كوردی زمانی توركی دەزانێت، هاوژینی نییە و سەڵتە.