رووداو دیجیتاڵ
سەرچاوەیەک لە وەزارەتی دارایی هەرێمی کوردستان دەڵێ، سبەی ئێوارە بە ئەگەری زۆر لیستی مووچەی مانگی ئایار بۆ بەغدا دەنێردرێت.
رۆژی سێشەممە، 19ی ئایاری 2026، سەرچاوەیەک لە وەزارەتی دارایی و ئابووریی هەرێمی کوردستان بە تۆڕی میدیایی رووداوی راگەیاند، "کارکردن لە لیستی مووچەی مانگی ئایار بەردەوامە و لە قۆناخی کۆتاییدایە. بەهۆی تەواونەبوونی هەندێک رێکارەوە ئەمڕۆش کارەکان تەواو نەبوون."
بە گوتەی سەرچاوەکەی رووداو، "چاوەڕوان دەکرێ سبەی کارەکان تەواو بن و ئیدی لیستەکە بۆ وەزارەتی دارایی فیدراڵ دەنێردرێت."
لەبارەی شێوازی گەیاندنی لیستەکە، سەرچاوەکەی وەزارەتی دارایی دەڵێ، بڕیارە لیستەکە و تەرازووی پێداچوونەوەی مانگی نیسان لەلایەن شاندێکی تەکنیکیی وەزارەتەوە ببرێتە بەغدا و رۆژی دواتر رادەستی وەزارەتی دارایی فیدراڵ بکرێت.
وەزارەتی دارایی و ئابووریی هەرێمی کوردستان 12ی ئەم مانگە خشتەی دابەشکردنی مووچەی مانگی نیسانی راگەیاند. بەپێی خشتەکە، دابەشکردنی مووچە لە رۆژی 13-05-2026 دەستیپێکرد و لە رۆژی 16-05-2026 کۆتایی هات.