تێچووی ژیان بۆ خێزانێکی چوار کەسی لە تورکیا 2260 دۆلاری تێپەڕاندووە

ناوەندی لێکۆڵینەوەی کۆمەڵایەتیی تورکیا راپۆرتی "هێڵی برسییەتی و هەژاری" بۆ مانگی ئاداری 2026 بڵاوکردەوە. 

بەگوێرەی توێژینەوەکە کە پشتی بە داتاکانی دەستەی ئاماری تورکیا (تویک)یش بەستووە، بۆ ئەوەی خێزانێکی چوار کەسی بتوانن خۆراکێکی تەندروست بخۆن، پێویستیان بە 32 هەزار و 553 لیرەی مانگانەیە.

لەگەڵ زیادکردنی پێداویستییە سەرەکییەکانی دیکە، هێڵی هەژاری بۆ 106 هەزار و 942 لیرە بەرزبووەتەوە.

لە راپۆرتەکەدا ئاماژە بە کاریگەریی خەرجییە بنچینەییەکانی وەک پەروەردە، تەندروستی، نیشتەجێبوون، گواستنەوە و گەرمکردنەوە لەسەر کۆی تێچووەکان کراوە. بەو جۆرە کۆی خەرجیی مانگانەی پێویست بۆ ژیانێکی شایستە بۆ خێزانێکی چوار کەسی، سنووری 100 هەزار لیرەی تێپەڕاندووە و گەیشتە ئاستێکی نوێ.

داتاکان دەریدەخەن کە دابینکردنی پێداویستییە سەرەکییەکان بۆ چینێکی بەرفراوانی کۆمەڵگە رۆژ بە رۆژ قورستر دەبێت.

بەگوێرەی داتاکانی خەرجیی رۆژانە کە لەم لیکۆڵینەوەیەدا هاتووە، بەرزترین تێچوو بۆ سەوزە و میوەیە کە 284 لیرەیە (6.4 دۆلار)، دواتریش شیر و ماست بە 222 لیرە (نزیکەی 5 دۆلار) لە پلەی دووەمە. شیر و بەرهەمەکانی بە 328 لیرەی رۆژانە و بە رێژەی 30.3% لە پلەی یەکەمدان. خەرجیی رۆژانەی گۆشت بە 194 لیرە و نان بە 84 لیرە تۆمارکراون.

راپۆرتەکە باس لەوە دەکات، تێچووی خۆراکی مانگانە لەسەر ئاستی تاکیش گەیشتووەتە ئاستێکی بەرز، بە جۆرێک خەرجیی خۆراکی مانگانە بۆ پیاوێکی پێگەیشتوو بە 8 هەزار و 879 لیرە (نزیکەی 2 هەزار دۆلار) و بۆ ژنێکی پێگەیشتوو بە 8 هەزار و 522 لیرە (نزیکەی 190 دۆلار) دیاریکراوە.

هەروەها تێچووی گەنجێکی تەمەن 15-18 ساڵ بۆ 9 هەزار و 135 لیرە و منداڵێکی تەمەن 4-6 ساڵ بۆ 6 هەزار و 17 لیرە بەرزبووەتەوە.