راوێژکارێکی عەلی زەیدی بۆ رووداو: عێراق داوای قەرزی لە سندووقی نێودەوڵەتیی دراو نەکردووە

رووداو دیجیتاڵ

راوێژکاری دارایی سەرۆکوەزیرانی عێراق، رایدەگەیێنێت، "عێراق تاوەکو ئێستا هیچ داواکارییەکی فەرمیی بۆ وەرگرتنی قەرز پێشکێشی سندووقی نێودەوڵەتیی دراو (IMF) نەکردووە."

موزهەر محەممەد ساڵح، راوێژکاری دارایی سەرۆکوەزیرانی عێراق سەبارەت بە پرسی وەرگرتنی قەرز لە سندووقی نێودەوڵەتیی دراو، بە تۆڕی میدیایی رووداوی گوت، "قەرزکردن، پێویستی بە رەزامەندیی هەردوو دەسەڵاتی جێبەجێکردن و یاسادانان هەیە، تاوەکو ئێستا داوای قەرز لە سندوقی نێودەوڵەتی دراو نەکراوە."

عێراق لە ساڵی 1945ـەوە ئەندامی سندوقی نێودەوڵەتیی دراوە، راوێژکاری دارایی سەرۆکوەزیرانی عێراق روونیکردەوە، ئەو قەرزانەی سندووقەکە دەیاندات، زۆرجار کۆمەڵێک بەرنامەیان لەگەڵدایە کە سندووقەکە بە "چاکسازی" ناویان دەبات و پێویستە وڵاتانی ئەندام پەیڕەویان بکەن.

راوێژکارەکەی سەرۆکوەزیرانی عێراق گوتی، "لەبەر رۆشنایی بارودۆخی جیۆپۆلەتیکیی ئێستا کە کاریگەریی لەسەر هەناردەی نەوتی وڵات هەیە، بەتایبەتی بەهۆی لێکەوتەکانی داخستنی تەنگەی هورمزەوە، ئێستا راوێژ و پەیوەندییەکان لەگەڵ سندووقەکە بە چڕی بەردەوامن."

بە گوتەی موزهەر محەممەد ساڵح، "ئەم جۆرە پەیوەندییانە لە کاتە هەستیارەکاندا لەنێوان سندووقی نێودەوڵەتی دراو و وڵاتانی کەنداو و عێراقدا ئاسایین، چونکە ئەم وڵاتانە راستەوخۆ کاریگەر دەبن بەو بارودۆخانە. دوای 2004وە، بەهۆی بارودۆخی جیاوازی ئابوورییەوە، نزیکەی پێنج رێککەوتنی لەگەڵ سندووقی نێودەوڵەتیی دراودا کردووە."

نزیکەی 90% داهاتی عێراق پشتی بە نەوت بەستوە، رۆژی هەینی، 22ی ئایاری 2026، باسم محەممەد خزەیر، وەزیری نەوتی عێراق بە تۆڕی میدیایی رووداوی راگەیاند،، ئێستا تاکە دەروازەی هەناردەکردنی بەردەوامی نەوت لە رێگەی بۆری هەرێمی کوردستانەوەیە بۆ جەیهان؛ ئەو بڕە نەوتەی ئێستا لە رێگەی هورمزەوە هەناردە دەکرێ، کەمترە لە 10%ی دۆخی ئاسایی.

بەگوێرەی وەزارەتی نەوتی عێراق، داهاتی نەوتی عێراق لە مانگی رابردوودا یەک ملیار و 87 ملیۆن دۆلار بووە. لەکاتێکدا مووچەی فەرمانبەران و مووچەخۆرانی عێراق پێویستی بە زیاتر لە حەوت تریلیۆن دینارە.