وەزیری دادی تورکیا دەڵێ، رێکاری یاسایی بەرامبەر سەرۆکی جەهەپە دەگرێتەبەر

دوای ئەوەی ئۆزگور ئۆزەل، سەرۆکی جەهەپە هەندێک قسەی لەبارەی ماڵ و سامانی وەزیری دادی تورکیا بڵاوکردەوە، ئەو بابەتە لە تورکیادا بووەتە رۆژەڤ. 

وەزیری دادی تورکیا گوتی: "ئەو لێدوانانەی ئەمڕۆ ئۆزگور ئۆزەل لەبارەی من بڵاویکردنەوە، پشت بە هیچ بەڵگەیەک نابەستن و تەنیا هەوڵێکی چەواشەکارانەی ئاشکران بۆ سەرنجی رای گشتی. بەرامبەر ئەم تۆمەتانە دەستبەجێ رێکاری یاسایی دەگرمەبەر، بەتایبەت بۆ داوای قەرەبووی مەعنەوی."

گورلەک رایگەیاند: "زیاتر لە 20 ساڵە لە پلە جیاوازەکاندا خزمەت بە دەوڵەتەکەم دەکەم. لەگەڵ هاوژینەکەم کە ئەویش دادوەرە، بەگوێرەی یاسا و رێساکان بەردەوام راپۆرتی دارایی و سامانی خۆمان پێشکێشی لایەنە پەیوەندیدارەکان کردووە".

بە گوتەی وەزیری دادی تورکیا، ئەو کاخەزانەی دراونەتە ئۆزگور ئۆزەل، لە تۆمارەکانی تاپۆدا هیچ پێشینەیەکیان نییە و تەنیا بۆ مەبەستی چەواشەکردنی خەڵک بڵاوکراونەتەوە.

هەروەها دەڵێ:"لەبەر ئەوەی لە کاتی کارکردنمدا وەک دادوەر، رووبەڕووی تیرۆر و گرووپە تاوانکارییەکان بوومەتەوە، بەم شێوەیە و ناپەرسیارانە دەکرێمە ئامانج، کە ئەمەش بەشێکە لە هەڵمەتێکی سیستماتیکی ناوزڕاندن".

گورلەک بە پێویستی زانی ئەوانەی دەڵێن بەڵگەیان لایە، بڕۆنە دادگە نەوەک لە سەکۆ سیاسییەکانەوە ئەو زانیاری و بانگەشانە بڵاوبکەنەوە. 

ئۆزگور ئۆزەل سێشەممە 17-3-2026 لە کۆنفرانسێکی رۆژنامەڤانیدا لە بارەگای گشتیی پارتەکەی گوتی، ئاکن گورلەک، وەزیری دادی تورکیا "بایی  452 ملیۆن لیرە (نزیکەی 13 ملیۆن دۆلار) موڵک و ماڵی هەیە".

ئۆزەل گوتی، ئەگەر وەزیری دادی تورکیا "بۆ 19 ساڵ هەموو مووچەکانی بەرزترین پلەی وەزیفە لە تورکیا وەربگرێ و هیچیش خەرج نەکات، کۆی مووچەکەی دەگاتە 45 ملیۆن لیرە (نزیکەی 1.4 ملیۆن دۆلار) واتە بە مووچەی 19 ساڵ".