رووداو - تەندروستی
پسپۆڕێکی نەشتەرگەریی چاو و تۆڕی چاو ئاشکرای دەکات، ئەگەر بە ناڕێکی و نادروستی یارییە ئاگرینییەکان بەکاربهێنرێت، یەکەم ئەندام کە زیانی پێبگات، چاوەکان دەبێت و هۆشداریش دەدات کە منداڵان بە تەنیا بەکاریان نەهێنن.
د. حەسەن خۆشناو، پسپۆڕی نەشتەرگەریی چاو و تۆڕی چاو بە رووداوی راگەیاند، هەموومان لەکاتی بۆنە و جەژنەکاندا حەز بە بینینی دیمەنە جوانەکانی یارییە ئاگرینەکان دەکەین، بەڵام تەنیا ساتێک کەمتەرخەمی، رەنگە ببێتە هۆی کوێربوونی هەمیشەیی، چونکە چاو یەکێکە لە ناسکترین ئەندامەکانی جەستە و بەرگەی زەبری بەهێز ناگرێت.
برینداربوونی چاو بەهۆی یارییە ئاگرین و تەقەمەنییەکانەوە دەکرێت ببێتە هۆی؛
- روشان و دڕانی قووڵی گلێنەی چاو.
- خوێنبەربوونی ناوەکی و بەرزبوونەوەی پەستانی چاو.
- جیابوونەوەی تۆڕی چاو.
- لەدەستدانی هەمیشەیی و تەواوەتیی بینین.
دایک و باوکان بەم شێوەیە منداڵەکانیان بپارێزن
1- هەرگیز رێگە بە منداڵان مەدە بە تەنیا یارییە ئاگرینییەکان بەکاربهێنن.
2- لەکاتی داگیرساندنیاندا، دوور بکەوەرەوە و مەودایەکی سەلامەت بپارێزە.
3- ئەگەر ناچاربوویت لە نزیکەوە ئامادە بیت، چاویلکەی پارێزەری تایبەت بەکاربهێنە.
4- تەنیا ئەو یارییانە بەکاربهێنە کە مۆڵەتپێدراون و لەژێر چاودێریی کەسانی شارەزادان.
فریاگوزارییە سەرەتاییەکان لەکاتی پێکانی چاوەکاندا؛
* هەرگیز چاو مەخورێنە و پەستانی مەخەرە سەر.
* هەوڵ مەدە هیچ تەنێکی بێگانە (وەک پارچەی بارووت یان کاخەز) لەنێو چاو دەربهێنیت.
* چاوەکە بە نەرمی بە پارچە پەڕۆیەکی پاک بپۆشە (بێ ئەوەی پەستانی بخەیتە سەر).
* بە پەلە و بێ دواکەوتن سەردانی پزیشکی پسپۆڕی چاو یان بەشی فریاکەوتن بکە.
لە کۆتاییشدا دەڵێت: چاوەکان گەنجینەیەکن کە جێگەیان ناگیرێتەوە. رێگە مەدەن چەند چرکەیەک خۆشی، ببێتە هۆی پەشیمانییەکی تەمەنێک.