بەهۆی داخرانی تەنگەی هورمزەوە سعودیە پەنا بۆ بازرگانی بە شەمەندەفەر دەبات

مۆڵەتە نوێیەکە توانای گواستنەوەی بار لە رێگەی هێڵی ئاسنینەوە زیاد دەکات، ئێستاش رۆژانە زیاتر لە 2500 کۆنتێنەر لە رێگەی هێڵی ئاسنینەوە دەگوازێتەوە. ئەم هەنگاوە گرنگییەکی زیاتری هەیە، چونکە بەندەرەکانی سعودیە لەسەر دەریای سوور دەبنە خاڵی هاتنەناوەوەی جێگرەوە بۆ ئەو کاڵایانەی روو لە کەنداو دەکەن.

ئەم گۆڕانکارییە لە بواری تیۆریدا نەماوەتەوە و هەزاران بارهەڵگر دەستیان بە گواستنەوەی کاڵا لە بەندەرەکانی رۆژئاوای سعودیەوە بۆ وڵاتانی وەک کوێت و بەحرەین کردووە. ئەمەش پشتیوانیی زیاتر لە خاکی سعودیە دەکات وەک رێڕەوێکی وشکانی بۆ دابینکردنی پێداویستییەکان، بەتایبەتیش لە سایەی ئەو کۆتوبەندانەی کە لەسەر جووڵەی بازرگانی لە رۆژهەڵاتدا هەن.

ئەمە لەدوای راگەیاندنی رێڕەوێکی لۆجستیی وشکانیی نوێ دێت کە شاری دەمام بە شاریقەوە دەبەستێتەوە، ئەمەش ئاماژەیە بۆ خێراکردنی دروستکردنی تۆڕێکی گواستنەوەی جێگرەوە کە وشکانی، دەریا و هێڵی ئاسنین پێکەوە گرێ دەدات.

کۆمپانیای "سار" کە لە ساڵی 2006 دامەزراوە، رۆڵێکی سەرەکی دەگێڕێت وەک بەڕێوەبەری سەرەکیی تۆڕی هێڵی ئاسنینی سعودیە. کۆمپانیاکە هێڵەکانی گواستنەوەی گەشتیاران و باری بازرگانی بەڕێوەدەبات، لەنێویاندا هێڵی باکوور-باشوور کە ناوچەکان بە بەندەرەکانەوە دەبەستێتەوە.