رووداو دیجیتاڵ
دەسەڵاتی فڕۆکەوانیی مەدەنیی عێراق بڕیاری دا ماوەی داخستنی ئاسمانی وڵاتەکە بەڕووی گەشتە ئاسمانییەکان بۆ 72 کاژێری دیکە درێژبکاتەوە، ئەوەش بەهۆی ناسەقامگیریی دۆخی ئەمنی و هەڵکشانی گرژییەکانی ناوچەکە.
بەپێی راگەیێندراوێکی فەرمیی دەسەڵاتی فڕۆکەوانی، بڕیارەکە لە نیوەڕۆی ئەمڕۆ پێنجشەممە، 19ی ئاداری 2026 ـەوە دەستپێدەکات و تاوەکو نیوەڕۆی رۆژی یەکشەممە 22ی ئادار بەردەوام دەبێت. ئەم بڕیارە هەموو گەشتە هاتوو، رۆیشتوو و تێپەڕبووەکان (ترانزێت) دەگرێتەوە.
دەسەڵاتی فڕۆکەوانیی مەدەنیی عێراق جەخت دەکاتەوە کە ئەم هەنگاوە وەک رێکارێکی "خۆپارێزیی کاتی" گیراوەتەبەر و لەسەر بنەمای هەڵسەنگاندنی بەردەوامە بۆ دۆخی ئەمنی و پێشهاتە هەرێمییەکان.
هەروەها ئاماژە بەوە دراوە کە سەرجەم کۆمپانیاکانی فڕۆکەوانی و لایەنە پەیوەندیدارەکان لە هەر نوێکارییەک کە لە داهاتوودا رووبدات، ئاگادار دەکرێنەوە.
لە 28ی شوباتی ئەمساڵەوە، کاتێک هێرشەکانی ئەمریکا و ئیسرائیل بۆ سەر ئێران دەستیپێکرد، ئاسمانی عێراق بەڕووی گەشتە مەدەنییەکاندا داخراوە.
هۆکاری سەرەکیی ئەم بڕیارە بۆ ئەوە دەگەڕێتەوە کە هەریەک لە ئێران، ئیسرائیل و ئەمریکا، ئاسمانی عێراق وەک رێڕەوێک بۆ هاویشتنی مووشەک و فڕینی فڕۆکە جەنگییەکان لە جەنگەکەیاندا بەکاردەهێنن، ئەمەش مەترسییەکی گەورەی لەسەر سەلامەتیی فڕۆکە مەدەنییەکان دروستکردووە.