رووداو دیجیتاڵ
جولیان ئەلڤارێز، ئەستێرەی ئەرجەنتینی، نهێنییەکانی ژیانی وەرزشیی خۆی ئاشکرا دەکات کە چۆن لە گوندێکی دووردەستەوە توانیویەتی ببێتە یاریزانی مانچێستەر سیتی و ئاتلێتیکۆ مەدرید و دواتریش مۆندیال بۆ وڵاتەکەی بباتەوە. ئەو نهێنیییەکی سەرسوڕهێنەری ئاشکرا دەکات و دەڵێت "باوکم جووتیار بوو، بەڵام هەمیشە رێنماییەکانی وانە بوون بۆ پێگەیاندنم، باوكم لەبارەی تاتۆی سەر جەستە و کحولەوە زۆر تووند بوو لەگەڵ مندا، بۆیە هەرگیز ئەو دوو کارەم نەکردووە و نایکەم".
جولیان ئەلڤارێز، ئەستێرەی ئەرجەنتینی و هێرشبەری یانەی ئاتلێتیکۆ مەدرید، لە هەڤپەیڤینێکی نوێدا لێدوانێکی ورووژێنەری لەبارەی ژیانی تایبەتی و رێگای سەختی بەرەو ئەستێرەیی و درەوشانەوە لە یاریگەکاندا دەدات، لەو کاتەوەی لە ساڵی 2021 نازناوی کۆپا ئەمریکای لەگەڵ ئەرجەنتین بەدەستهێنا".
جولیان ئەلڤارێز یەکێکە لە باشترین یاریزانەکانی ئاتلێتیکۆ مەدرید و خولی ئیسپانی لەم وەرزەدا، کە دووەم وەرزیەتی لەو کاتەوەی لە مانچێستەر سیتییەوە گواسترایەوە بۆ یانەی پایتەختی ئیسپانیا، ئەو یانەیەی کە چەندین نازناوی لەگەڵیدا بەدەستهێنا.
لە هەڤپەیڤینێکی تایبەتدا لەگەڵ کەناڵی لیکیپی فەرەنسی، جولیان ئەلڤارێز، پاڵەوانی جیهانی 2022، لایەنە ورووژێنەر و شاراوەکانی ژیانی خێزانی خۆی خستەڕوو، گوتی کە ئەوانە یارمەتیدەر بوون لە پێکهێنانی کاروانی وەرزشی و کۆمەڵایەتی و گەیشتنی بەوەی کە ئێستا لە یانەی ئاتلێتیکۆیە.
جولیان ئەلڤارێز، کە لە شاری کالشین لە مانگی یەنایەری 2000 لەدایکبووە، ئاشکرای کرد کە باوکی کاریگەرییەکی گەورەی هەبووە لە گەورەبوون و پەرەپێدانی ژیانی وەرزشییەکەی لەو کاتەوەی لەگەڵ تیپەکانی لاوان لە وڵاتەکەی یاری کردووە.
ئەو گوتیشی کە زۆر لەو نەریت و دیاردانەی کە لە تۆپی پێی جیهاندا باو بوون، وەک تاتۆکردنی جەستەی یاریزانان یان خواردنەوەی کحول و شتی دیکە، ئەنجام نادات بەهۆی ئەوەی دایک و باوکی فێریان کردووە کە کام کار هەڵەیە و نابێت بیکات و کامیان دروستە و دەبێت بیکات.
جولیان ئەلڤارێز لە دەرەوەی یاریگە وەک گەنجێکی خۆپارێز و پابەند دەردەکەوێت و لەو بارەیەوە گوتی "گەورەبوون لە گوندەکانی ئەرجەنتین مرۆڤ فێری پابەندی دەکات. دایک و باوکم لە منداڵییەوە رەوشتی ژیان و پەروەردەیەکیان پێبەخشیوم، کە یارمەتیدەر بوون لەوەی ببمە کەسێکی پابەند و دوور لە رەفتارە ناشیرینەکان، ئەوان وایانکرد لیستی دەستکەوتە نایابەکانم درێژتر بکەمەوە".
ژیان لە گوند
ئەو زیاتر لەبارەی ژیانی خۆی لە گوندەکەیان قسەی کرد و گوتی"لە کالشین گەورە بووم، گوندێکی بچووکە لە پارێزگای کۆردۆبا لە ئەرجەنتین، کە زۆربەی دانیشتووانەکەی بە کشتوکاڵەوە خەریکن، چەندە دەرفەت هەیە کە کوڕێک لەوێ ببێتە یاریزانێکی پیشەگەری تۆپی پێ؟ بێگومان رێژەیەکی زۆر کەمە، باوکم جووتیار بوو، وەک هەمووان لەوێ".
بە گوتەی یاریزانەکەی ئاتلێتیکۆ مەدرید لەو گوندەدا کە ژمارەی دانیشتووانەکەی 3000 کەسە، دەرفەتەکان زۆر سنووردار بوون بۆ ئەنجامدانی چالاکییەکانی دیکە جگە لە کشتوکاڵ یان کارە سادەکان.
ئەو گوتی "سەرەڕای دەرفەتە دەگمەنەکان لە ناوچەیەکی دوورەدەست وەک گوندەکەمان، من دۆزرامەوە و لەوێوە دەروازەی دیکە بۆ سەرکەوتن کرانەوە، تووندوتیژی باوکم و ئامۆژگارییەکانی دایکم دڵنیایی ئەوەیان پێدام کە رۆژێک خەونەکانم و خەونەکانی ئەوانیش بەدی دەهێنم".
ئەلڤارێز ئاشکرای کرد کە باوکی فێری کردووە کە خواردنەوەی کحول و تاتۆکردنی سەر جەستە بە تەواوی ڕرەتکراوەیە. گوتیشی کە بە تێپەڕبوونی رۆژگار زیاتر دڵنیابووەتەوە کە ئەو هەڵوێستەی دایک و باوکی زۆر دروست بووە، چونکە هەرگیز کحول ناخواتەوە و تاتۆ لەسەر جەستەی ناکات وەک زۆربەی یاریزانان دەیکەن.
جولیان ئەلڤارێز لە وەرزی 2025-2026 ئاستێکی ناوازەی لەگەڵ ئاتلێتیکۆ مەدرید پێشکێش کردووە، چونکە 7 گۆڵی لە خولی ئیسپانیا و 3 گۆڵی دیکە لە خولی یانە پاڵەوانەکانی ئەوروپا تۆمارکردووە، لەگەڵ 4 ئاسیست لە 14 یارییدا لە هەردوو پاڵەوانێتییەکەدا.
ریال رەتیکردەوە
ئەلڤارێز چیرۆکێکی سەرنجڕاکێشی لەگەڵ ریال مەدرید هەیە، کە لە سەرەتای ژیانی وەرزشی و پێش ئەوەی نێوبانگ دەربکات، سەرنجی دۆزەرەوەکانی بەهرەی ریال مەدریدی ئیسپانی راکێشا. یانە شاهانەییەکە هەوڵیدا گرێبەستی لەگەڵدا بکات، بەڵام خێزانەکەی ئەو پێشنیازەیان رەتکردەوە.
رۆژنامەی مارکای ئیسپانی بڕیارەکەی بە "لێهاتوو و ژیرانە" وەسف دەکات، چونکە یارمەتیدەر بووە لە دروستکردنی ئەفسانەیەکی نوێ لە جیهانی تۆپی پێدا.
مارکا دەڵێت "لە تەمەنی 11 ساڵیدا ئەلڤارێز بەهرەیەکی نایابی هەبوو و سەرنجی راکێشا. دۆزەرەوەکانی بەهرە لە ریال مەدرید توانایەکی زۆریان لەو یاریزانەدا تێبینی کرد، بەڵام خێزانەکەیان پێیانوابوو کاتەکە گونجاو نییە بۆ گواستنەوەی بۆ ئەورووپا".
ئەو رۆژنامەیە زیاتر دەڵێت "خێزانەکە دیدگایەکی دوورمەودایان هەبوو، جولیان پێویستی بە گەشەی زیاتری کەسی و وەرزشی هەبوو، خێزانەکە بڕیاریاندا لە ئەرجەنتین بیهێڵنەوە، لەوێ بەردەوام بوو لە گەشەپێدانی خۆی و فێربوونی بەهاکانی راهێنان و بێفیزی".
رۆژنامەکە لێدوانەکانی پیێرۆ فۆگلیا، دۆزەرەوەی بەهرەی جولیان ئەلڤارێز دەگوازێتەوە، کە روونی دەکاتەوە چۆن پشتیوانی خێزان کاریگەرییەکی یەکلاکەرەوەی هەبووە لە دروستکردنی کەسایەتی یاریزانەکەدا.
فۆگلیا دەڵێت "باوک و دایکی هەمیشە لەگەڵیدا بوون و بەشدارییان لە بڕیاردانەکانیدا دەکرد، باوەڕیان وابوو کە سەقامگیریی سۆزداری و رێنمایی دروست لە داهاتوودا دەیکاتە یاریزانێکی گەورە، هەروەها پێویستی بە کات دەبێت بۆ ئەزموونکردن و پێگەیشتنی پێویست بۆ ڕووبەڕووبوونەوەی گەورەترین ئاستەنگەکانی ژیانی وەرزشی".
گواستنەوەیەکی لۆژیکی بۆ ئاتلێتیکۆ مەدرید
فۆگلیا پێیوایە گواستنەوەی جولیان بۆ ئاتلێتیکۆ مەدرید لە هاوینی رابردوودا بڕیارێکی لۆژیکی بوو، ئاماژەی بەوەدا کە "تایبەتمەندییە هونەری و جەستەییەکانی بە تەواوی لەگەڵ فەلسەفەی یانەکە و شێوازی یاریکردنیدا دەگونجێن".
فۆگلیا وەک بەڵگە بۆ قسەکانی دەڵێت "جولیان لە وەرزی یەکەمی خۆیدا توانی لەگەڵ شێوازی ئاتلێتیکۆدا بگونجێت و ژمارەی گۆڵکردنی سەرسوڕهێنەری هەبوو".
ئەو هەروەها ئاماژە بەوە دەکات کە ئەلڤارێز تەنیا هێرشبەرێک نەبووە کە گرنگی بە گۆڵکردن بدات، بەڵکو یاریزانێکی زیرەک و تەواو بووە، یارمەتی هاوکارەکانی دەدات و هەوڵێکی زۆر دەدات بۆ پچڕاندن و گەڕاندنەوەی تۆپ لە رکابەرەکانی، هەمیشە بەدوای باشترکردنی بەردەوامدا بووە و بەهیچ دەستکەوتێک رازی نەبووە، بەڵکو هەوڵی بەدەستهێنانی زیاتری داوە.
فۆگلیا جەخت لەوە دەکاتەوە کە نابێت جولیان بەهیچ یاریزانێکی دیکە بەراورد بکرێت، چ مارادۆنا بێت یان مێسی، بەڵکو دەبێت رێگەی پێبدرێت رێگەی تایبەتی خۆی بگرێتەبەر بەپشتبەستن بە تواناکانی ناوازەی خۆی.
خاکەڕایی و پێداگری
سەبارەت بە خەسڵەتە کەسییەکانی ئەلڤارێز، دۆزەرەوەکەی دەڵێت "سەرەڕای ئەو دەستکەوتە گەورانەی کە جولیان پێش تەمەنی 25 ساڵی بەدەستیهێناون، لە بردنەوەی جامی جیهانی و کۆپا ئەمریکا تاوەکو چامپیۆنزلیگ، هێشتا هەمان بێفیزی خاکەڕایی و پێداگری تێدایە کە لە منداڵیدا تایبەتمەندی بوون".
لەکۆتاییدا دەڵێت "جولیان هەمیشە بە پەرۆشە بۆ پاراستنی سەرنجی بەرزی خۆی، جا لە مەشق و راهێنان بێت یان یارییەکان، و بەدوای رێگەکانی گەشەپێدانی خۆیدا دەگەڕێت، و سەرەڕای ئەوەی نزیکەی هەموو شتێکی بردووەتەوە، بەڵام ئارەزووی بۆ بەدەستهێنانی زیاتر نەوەستاوە، ئەمەش وای لێکردووە کە ئێستا یەکێک بێت لە تەواوترین یاریزانەکانی جیهان".