ساخنەبوونەوەی بیبەر 50 ملیۆن دینار زەرەر لە جووتیارێکی هەڵەبجە دەدات

رووداو دیجیتاڵ

بیبەری هەرێمی کوردستان گەیشتووەتە ئاستی خۆبژێوی، بەڵام ساخنەبوونەوە و هەرزانییەکەی لە بازاردا زیان بە جووتیاران دەگەیێنێت. جووتیارێکی هەڵەبجە دەڵێ: "50 ملیۆن دینار زەرەرم کردووە."

هەژار عەبدوڵڵا، 30 دۆنم زەویی بە بیبەر چاندووە و بەرهەمەکەی 300 تۆنە، بەڵام ئەم بە بڕشتییە نەک قازانجی بۆی نەبووە، بەڵکو زەرەریش دەکات و وەک خۆی دەڵێ: 50 ملیۆن دینارە.

هەژار عەبدوڵڵا، جووتیاری نموونەییە و ماستەری لە زانستەکانی کشتوکاڵیشدا هەیە، سەرەڕای بەرهەمهێنانی چەند بیبەرێکی جیاواز لە تام و رەنگدا، بەڵام لەبەر بێبازاڕی، ئەم ساڵ بەری رەنجی ئەگەر بشچنێتەوە، دەستمایەکەی پڕ ناکاتەوە.

هەژار قسەی بۆ تۆڕی میدیایی رووداو کرد و گوتی، "بەرەهەمەکەی لە بازاڕەکانی هەرێمی کوردستاندا کڕیاریان کەمە، ئێستا کیلۆی بیبەر لە بازاڕدا بە 100 دینار دەفرۆشرێت، کە تەنانەت کرێی کرێکار و گواستنەوەش دەرناکات. ئەمە 50 ملیۆن دینار زەرەری لێداوم و وای لێکردووم بیر لە چاندنی بیبەر نەکەمەوە."

لەبارەی ئەم گرفتەی هەژار عەبدوڵڵا، تۆڕی میدیایی رووداو پەیوەندیی کرد بە قارەمان قادر، گوتەبێژی وەزارەتی کشتوکاڵ و رایگەیاند، "لە کاتی پێگەیشتنی بەروبوومی خۆماڵیدا، بە دانانی باج و گومرگ لەسەر بەرهەمی هاوردە و رێگەدان بە هەناردەکردن، پشتگیری لە جووتیاران دەکات."

هەرچەندە ئاماری تایبەت بە بیبەر بەردەست نییە، بەڵام گوتەبێژەکەی وەزارەتی کشتوکاڵ رایگەیاند: "بەرهەمی سەوزە لە هەرێمی کوردستان زۆر بووە و گەیشتووەتە ئاستی خۆبژێوی."

بە گوتەی قارەمان قادر، لە کاتی زۆربوونی بەرهەمدا بەشێک لە بیبەری خۆماڵی بۆ شارەکانی ناوەڕاست و خوارووی عێراق هەناردە دەکرێت.