رووداو دیجیتاڵ
گۆڕانکاری لە پۆستە باڵا میدیاییەکانی حکومەتی عێراق کرا؛ گوتەبێژی نوێی حکومەت لە یەکەم لێدوانیدا بۆ رووداو رایگەیاند، لە شوێنی باسم عەوادی دەستنیشانکراوە.
د. حەیدەر عەبوودی، گوتەبێژی نوێی حکومەتی عێراق ئەمڕۆ دووشەممە 1ی حوزەیرانی 2026، بە تۆڕی میدیایی رووداوی راگەیاند: "لە شوێنی باسم عەوادی وەک گوتەبێژی حکومەتی عێراق دەستنیشانکراوم، هەروەها عەبدولزەهرە هینداوی کراوەتە بەڕێوەبەری نووسینگەی راگەیاندنی سەرۆکوەزیرانی عێراق."
ئەم گۆڕانکارییانە دوای ئەوە دێن کە هەر ئەمڕۆ، عەلی فالح زەیدی، سەرۆکوەزیرانی عێراق، رەبیع نادر خەڵەف، بەڕێوەبەری نووسینگەی راگەیاندنەکەی لە ئەرکەکەی بەخشی.
بەگوێرەی فەرمانێکی کارگێڕیی ئەمڕۆ دووشەممەی نووسینگەی سەرۆکوەزیرانی عێراق، بڕیاردراوە بە بەخشینی رەبیع نادر خەڵەف لە ئەرکی بەڕێوەبردنی نووسینگەی راگەیاندنی سەرۆکوەزیران، ئەوەش پشتبەستن بە داواکارییەکی پێشوەختەی خۆی، کە لە 24ی ئایاری 2026 پێشکێشی کردبوو.
رەبیع نادر لە پۆستێکدا رایگەیاند، سەرۆکوەزیران رەزامەندی لەسەر داواکەی دەربڕیوە کە بەهۆی "هۆکاری تایبەتەوە" داوای بەخشینی کردبوو، هاوکات پیرۆزبایی لە حەیدەر عەبوودی و عەبدولزەهرە هینداوی کرد بەبۆنەی وەرگرتنی پۆستە نوێیەکانیان.
د. حەیدەر عەبوودی، گوتەبێژی نوێی حکومەتی عێراق، پێشتر گوتەبێژی وەزارەتی خوێندنی باڵا و توێژینەوەی زانستی بووە. عەبدولزەهرە هینداویش گوتەبێژی وەزارەتی پلاندانانی عێراق بوو.