رووداو دیجیتاڵ
عەلی فالح زەیدی، سەرۆکوەزیرانی عێراق فەرمانیدا، کە دامەزراندنی دەرچووانی پێشوو لە پڕۆژەیاسای بودجەی گشتیدا بەگوێرەی پێویستیی راستەقینەی وەزارەتەکان جێگەى بکرێتەوە.
دووشەممە، 7ی ئەیلوولی 2026، نووسینگەی رۆژنامەڤانیی سەرۆکوەزیرانی عێراق رایگەیاند، کە عەلی فالح زەیدی فەرمانی داوە بە وەزارەتی دارایی، کە پلەی وەزیفی بۆ دامەزراندن و گرێبەستى دەرچووانی ساڵانی پێشووی زانکۆ و پەیمانگاکان لە پڕۆژەیاسای بودجەی گشتیی 2027دا تەرخان بکرێت.
بەگوێرەی بڕیارەکە، دامەزراندنی ئەو دەرچووانە بەگوێرەی پێویستیی راستەقینەی وەزارەتەکان دەبێت و حکومەت دەیەوێت سەرجەم تواناکان لە ماوەی ئەم کابینەیەدا لەخۆ بگرێت.
شێروان دووبەردانی، ئەندامی پەرلەمانی عێراق بە تۆڕی میدیایی رووداوی رایگەیاند: "ئەو دامەزراندنانە هەرێمی کوردستان ناگرێتەوە، بەڵام دەکرێت شاندی حکومەتی هەرێمی کوردستان داوا بکات کە لە پڕۆژەیاسای بودجەی گشتیی عێراقدا، جێگەی دەرچووانی زانکۆ و پەیمانگاکانی هەرێمی کوردستانیش بکرێتەوە."
نزیکەی چوار ملیۆن فەرمانبەر لە عێراقدا هەن، کە مووچەی مانگانەیان لەگەڵ خانەنشینان دەگاتە زیاتر لە حەوت تریلیۆن دینار.
شێروان دووبەردانی ئاماژەی بەوەش کرد کە زۆرینەی دەرچووانی پێشوو کە دەبێت بەگوێرەی یاسا دابمەزرێن، دەرچووانی بەشە پزیشکییەکانن کە تاوەکو ئێستا دانەمەزراون.
