رووداو دیجیتاڵ
هاوپەیمانیی چوارچێوەی هاوئاهەنگی تاوتوێی پەسندکردنی چەند پڕۆژە یاسایەک دەکات، لەوانە نەوت و گاز و ئەنجوومەنی فیدراڵی.
ئەو هاوپەیمانێتییەیە کە زۆرینەی لایەنە شیعەکان تێیدا ئەندامن، شەوی دووشەممە 7ى ئەیلوول لە نووسینگەی حەیدەر عەبادی، سەرۆکی هاوپەیمانیی نەسر کۆبووەوە.
بەگوێرەی راگەیێندراوی ئەو هاوپەیمانێتییە، لە کۆبوونەوەکەدا باس لە تەواوکردنی هەنگاوەکان بۆ پەسندکردنی چەند پڕۆژەیاسایەک کراوە کە بریتین لە پڕۆژەیاساکانی دەستەی حەشدی شەعبی، نەوت و گاز، ئەنجوومەنی فیدراڵی و دادگای باڵای فیدراڵی.
یاسای حەشدی شەعبی لە خولی پێشووی پەرلەمان تاوەکو قۆناخی دەنگدان رۆیشت و لەلایەن حکومەتەوە کشێنرایەوە.
یاسای نەوت و گاز لە ساڵی 2007ەوە کاری لەسەر دەکرێ. یاسای ئەنجوومەنی فیدراڵیش لە خولی پێشوو ئامادەکرا بەبێ ئەوەی هەنگاو بۆ پەسندکردنی بنرێ.
هاوپەیمانیی چوارچێوەی هاوئاهەنگی رایگەیاند، دەرچوواندنی ئەو یاسایانە رۆڵیان دەبێت لە تەواوکردنی بونیاتنانی دەستووری و دامەزراوەیی دەوڵەت.
بڕگەیەکی دیکەی کۆبوونەوەی هاوپەیمانیی چوارچێوەی هاوئاهەنگی تایبەت بوو بە دۆخی نێوخۆی ئەو هاوپەیمانێتییە و لە راگەیێندراوەکەدا ئاماژە بەوە دراوە کە پەیڕەو و بنەما دادەنرێ بۆ رێکخستنی میکانیزمی کار و بڕیاردان لەنێو هاوپەیمانێتییەکە بە مەبەستی بەهێزکردنی و یەکگرتوویی هەڵوێستەکانیان.
