رووداو دیجیتاڵ
کۆمپانیای دابەشکردنی بەرهەمە نەوتییەکانی عێراق روونکردنەوە لەبارەی نرخی سووتەمەنی دەدا و دەڵێ، نرخەکان بۆ هاووڵاتییان وەک خۆیان دەمێننەوە و گۆڕانکارییەکان تەنیا بۆ دامەزراوەکانی دەوڵەت و کەرتەکانی دیکەن.
کۆمپانیای دابەشکردنی بەرهەمە نەوتییەکانی عێراق، رۆژی هەینی(11ـی ئەیلوولی 2026)، رایگەیاند:" ئەو دەنگۆیانەی لە تۆڕە کۆمەڵایەتییەکاندا لەبارەی گۆڕانی نرخی بەرهەمە نەوتییەکان بڵاوبوونەتەوە، هاووڵاتییان ناگرێتەوە ".
کۆمپانیای دابەشکردنی بەرهەمە نەوتییەکانی عێراق راشیگەیاندووە، ئەو نرخە نوێیانەی باس دەکرێن تەنیا تایبەتن بە فەرمانگە و دامەزراوەکانی دەوڵەت و کەرتەکانی دیکە.
هەروەها ئەو بەرهەمە نەوتییانەی بۆ هاووڵاتییان دابین دەکرێن، بە هەمان نرخی پاڵپشتیکراوی پێشوو دەبن کە لای هەمووان ناسراوە و هیچ زیادبوونێک نایانگرێتەوە.
حکومەتی عێراق ساڵانە بڕێکی زۆر پارە بۆ پاڵپشتیکردنی نرخی سووتەمەنی (بەنزین، نەوتی سپی و گازوایل) تەرخان دەکات تاوەکو بە نرخێکی کەمتر لە تێچووی راستەقینەی خۆی بگاتە دەست هاووڵاتییان.
نرخی بەنزینی پاڵپشتیکراو بۆ هەر لیترێک:
نۆرمال : 450 دینار
موحەسەن : 850 دینار
سوپەر: 1250 دینار
نەوتی سپی بۆ هاووڵاتییان : 150 دینار بۆ هەر لیترێک
زەیتی گاز(دیزل) بۆ هاووڵاتییان : 400 دینار بۆ هەر لیترێک
